farz

pech-dar-pech masā.il meñ sadā

zindagī ne mujhe uljhā.e rakhā

aur maiñ peT ke dozaḳh ke liye

roz-o-shab tang siyah rastoñ par

le ke ummīd kā chhoTā sā diyā

kabhī is goshe kabhī us goshe

izzat-e-nafs-o-anā saath liye

biij mehnat ke sadā botī rahī

bistar-e-aish ke sapne le kar

farsh-e-sangīñ pe sadā sotī rahī

apnī hastī ko miTā kar aksar

kār-e-dushvār ko āsān kiyā

apne bachchoñ ke ta.ayyush ke liye

ho ke begāna-e-ārām-o-sukūñ

har ghaḌī kaam faqat kaam kiyā

aaj jab bachche javāñ-sāl hue

be-niyāzāna ye kah kar guzre

aaj tak aap ne jo kuchh bhī kiyā

ham pe ehsān nahīñ hai ye na qarz

ye haqīqat meñ hai maañ baap kā farz

pech-dar-pech masail mein sada

zindagi ne mujhe uljhae rakha

aur main peT ke dozaKH ke liye

roz-o-shab tang siyah raston par

le ke ummid ka chhoTa sa diya

kabhi is goshe kabhi us goshe

izzat-e-nafs-o-ana sath liye

bij mehnat ke sada boti rahi

bistar-e-aish ke sapne le kar

farsh-e-sangin pe sada soti rahi

apni hasti ko miTa kar aksar

kar-e-dushwar ko aasan kiya

apne bachchon ke tayyush ke liye

ho ke begana-e-aram-o-sukun

har ghaDi kaam faqat kaam kiya

aaj jab bachche jawan-sal hue

be-niyazana ye kah kar guzre

aaj tak aap ne jo kuchh bhi kiya

hum pe ehsan nahin hai ye na qarz

ye haqiqat mein hai man bap ka farz