marhum

kabhī tasvīr se bāhar nikal kar bol bhī uTTho

hamesha ek sā chehra liye kyuuñ takte rahte ho

zarā hoñToñ ko jumbish aur lafzoñ ko rihā.ī do

akelā paḌ gayā huuñ maiñ zarā merī safā.ī do

maañ aksar merī khāñsī par tumhārā dhokā khātī hai

ye baḌ kī merī ik aadat tumhārī sī batātī hai

tumhārī yaad aatī hai

kabhī pūchho ki itnī raat ko kyuuñ ghar maiñ aatā huuñ

kabhī DāñTo ki maiñ is tarah kyuuñ paise uḌātā huuñ

jinheñ tum Tokte the maiñ vo saare kaam kartā huuñ

tumhārā naam karne se rahā badnām kartā huuñ

maiñ ik hotel meñ cigarette pī rahā huuñ tum dikhā.ī do

maiñ rūThā huuñ merā kāñdhā chhuo

phir muskurāo aur khāne par bulā lo

mujhe Dar lag rahā hai aaj

mujh ko apne bistar par sulā lo

maiñ is mele meñ chal kar thak gayā huuñ

apne kāñdhe par biThā lo

qadam phir laḌkhaḌāte haiñ

mujhe uñglī do girtā huuñ sambhālo

mujhe sar-dard hai sar chhū ke

apne lams kī umda davā.ī do

maiñ phir se paas ho kar aa gayā huuñ thapthapāo

tū āḳhir merā beTā hai kaho maañ ko chiḌhāo

mujhe phir se usī halvā.ī kī lā kar miThā.ī do

suno ab log aksar pūchhte haiñ

kis ke beTe ho

tumhārā naam letā huuñ

to vo 'marhūm' kahte haiñ

magar nādān haiñ vo

baap bhī marhūm hotā hai

kabhi taswir se bahar nikal kar bol bhi uTTho

hamesha ek sa chehra liye kyun takte rahte ho

zara honTon ko jumbish aur lafzon ko rihai do

akela paD gaya hun main zara meri safai do

man aksar meri khansi par tumhaara dhoka khati hai

ye baD ki meri ek aadat tumhaari si batati hai

tumhaari yaad aati hai

kabhi puchho ki itni raat ko kyun ghar main aata hun

kabhi DanTo ki main is tarah kyun paise uData hun

jinhen tum Tokte the main wo sare kaam karta hun

tumhaara nam karne se raha badnam karta hun

main ek hotel mein cigarette pi raha hun tum dikhai do

main ruTha hun mera kandha chhuo

phir muskurao aur khane par bula lo

mujhe Dar lag raha hai aaj

mujh ko apne bistar par sula lo

main is mele mein chal kar thak gaya hun

apne kandhe par biTha lo

qadam phir laDkhaDate hain

mujhe ungli do girta hun sambhaalo

mujhe sar-dard hai sar chhu ke

apne lams ki umda dawai do

main phir se pas ho kar aa gaya hun thapthapao

tu aaKHir mera beTa hai kaho man ko chiDhao

mujhe phir se usi halwai ki la kar miThai do

suno ab log aksar puchhte hain

kis ke beTe ho

tumhaara nam leta hun

to wo 'marhum' kahte hain

magar nadan hain wo

bap bhi marhum hota hai