urmila

ye rāmāyan

jo hindustān kī rag rag meñ shāmil hai

jise ik bālmīkī naam ke shā.ir ne likkhā thā

bahut hī ḳhūbsūrat ek epic hai

fasāna-dar-fasāna baat koī munjamid hai

emotion qaid haiñ lākhoñ tarah ke

ka.ī kirdār haiñ jo sāhab-e-kirdār lagte haiñ

magar ik baat hai

jo muddatoñ se mujh ko khaltī hai

ki afsāne meñ

sab ke dard-o-ġham kā zikr miltā hai

magar vo ek laḌkī

phuul se bhī sau gunā nāzuk

jo siitā kī bahan thī

aur jis kī maañg meñ sindūr bharte vaqt hī

shrī raam ke bhaa.ī lakhan ne

aag kī maujūdgī meñ ye kahā thā

maiñ tum se zindagī-bhar ishq farmāyā karūñgā

aur saa.e kī tarah hī saath meñ har-dam rahūñgā

jo laḌkī ek pal meñ

saat janmoñ ke liye biivī lakhan kī ho ga.ī thī

vahī laḌkī

jise sab urmilā kah kar bulāte the

jo apne baap ke siine se lag kar vaqt-e-ruḳhsat ḳhuub roī

us ke ashkoñ se

fasāne kā koī hissa kahīñ bhīgā nahīñ hai

aur us ke dard kī koī nishānī tak nahīñ miltī

magar sach hai

ki rāmāyan meñ vaisā ġham-zada kirdār koī bhī nahīñ miltā

maiñ us kirdār se ḳhāsā muta.assir huuñ

ki jab chaudah baras ke vāste shrī-rām ko ban-vās jaanā thā

āmāda the lakhan bhī bhaa.ī kī sevā meñ jaane ko

zarā sā bhī nahīñ sochā

ki jis laḌkī se puurī zindagī kā rabt joḌā hai

ki jis ne ḳhūbsūrat nain meñ kuchh ḳhvāb bo.e haiñ

use kis ke sahāre chhoḌ kar vo jā rahe haiñ

magar vo urmilā ko chhoḌ kar bhaa.ī ke pīchhe chal paḌe

koī taḌaptī aarzū sī

urmilā ke hoñTh se gir kar

ka.ī TukḌoñ meñ nīche farsh par bikhrī huī thī

zor se āvāz nannhī phaḌphaḌā.ī

aur zaḳhmī ho gayā thā pyaar kā vo ek dāman

jo kabhī phūloñ kī ḳhushbū meñ bhigoyā thā

mahz kāñTe hī kāñTe har taraf the

ik imārat banñe se pahle hī TuuTī thī

to ya.anī urmilā chaudah baras tak

ḳhalvatoñ ke mausamoñ se roz laḌtī thī

sahelī saath thī

lekin sabhī ḳhushiyoñ ko vo ignore kartī thī

tamannā.eñ agar bādal kī tarah ghirne lagtī thiiñ

tamannāoñ kī bārish meñ nahāne se vo bachtī thī

churā letī thī vo āñkheñ

agar ġhalatī se koī aa.ina tārīf kar detā

havā.eñ jism meñ us ke agar siharan jagā detīñ

to ḳhud ko apnī hī bāñhoñ meñ bhar kar

ḳhud se ye kahtī

lakhan ā.eñge jaldī maan bhī jaao bahāroñ

aur so jaao sitāroñ tum

ki mujh ko raat din jagne kī aadat ho ga.ī hai

aur mohabbat ke liye ye umr kī daulat paḌī hai

magar jab ḳhvāhishoñ ke bāñdh aksar TūTte hoñge

to phir sailāb meñ

kyā kyā na bah kar kho gayā hogā

hazāroñ adh-khile armān bhī murjhā ga.e hoñge

tabassum ne

kisī pal Das liyā hogā laboñ ko gar

to saarā zahar mauqa dekh kar

us ke badan meñ raqs kartā phir rahā hogā

kabhī koyal kī kaalī kuuk gar kānoñ meñ pahuñchī ho

to shiryānoñ meñ bahtā ḳhuun saarā jam gayā hogā

parā.e mard kā koī tasavvur chhūne se pahle

vo laḌkī Dar ga.ī hogī

achānak mar ga.ī hogī

ye ramayan

jo hindustan ki rag rag mein shamil hai

jise ek baalmiki nam ke shair ne likkha tha

bahut hi KHubsurat ek epic hai

fasana-dar-fasana baat koi munjamid hai

emotion qaid hain lakhon tarah ke

kai kirdar hain jo sahab-e-kirdar lagte hain

magar ek baat hai

jo muddaton se mujh ko khalti hai

ki afsane mein

sab ke dard-o-gham ka zikr milta hai

magar wo ek laDki

phul se bhi sau guna nazuk

jo sita ki bahan thi

aur jis ki mang mein sindur bharte waqt hi

shri ram ke bhai lakhan ne

aag ki maujudgi mein ye kaha tha

main tum se zindagi-bhar ishq farmaya karunga

aur sae ki tarah hi sath mein har-dam rahunga

jo laDki ek pal mein

sat janmon ke liye biwi lakhan ki ho gai thi

wahi laDki

jise sab urmila kah kar bulate the

jo apne bap ke sine se lag kar waqt-e-ruKHsat KHub roi

us ke ashkon se

fasane ka koi hissa kahin bhiga nahin hai

aur us ke dard ki koi nishani tak nahin milti

magar sach hai

ki ramayan mein waisa gham-zada kirdar koi bhi nahin milta

main us kirdar se KHasa mutassir hun

ki jab chaudah baras ke waste shri-ram ko ban-was jaana tha

aamada the lakhan bhi bhai ki sewa mein jaane ko

zara sa bhi nahin socha

ki jis laDki se puri zindagi ka rabt joDa hai

ki jis ne KHubsurat nain mein kuchh KHwab boe hain

use kis ke sahaare chhoD kar wo ja rahe hain

magar wo urmila ko chhoD kar bhai ke pichhe chal paDe

koi taDapti aarzu si

urmila ke honTh se gir kar

kai TukDon mein niche farsh par bikhri hui thi

zor se aawaz nannhi phaDphaDai

aur zaKHmi ho gaya tha pyar ka wo ek daman

jo kabhi phulon ki KHushbu mein bhigoya tha

mahz kanTe hi kanTe har taraf the

ek imarat banne se pahle hi TuTi thi

to yani urmila chaudah baras tak

KHalwaton ke mausamon se roz laDti thi

saheli sath thi

lekin sabhi KHushiyon ko wo ignore karti thi

tamannaen agar baadal ki tarah ghirne lagti thin

tamannaon ki barish mein nahane se wo bachti thi

chura leti thi wo aankhen

agar ghalati se koi aaina tarif kar deta

hawaen jism mein us ke agar siharan jaga detin

to KHud ko apni hi banhon mein bhar kar

KHud se ye kahti

lakhan aaenge jaldi man bhi jao bahaaron

aur so jao sitaron tum

ki mujh ko raat din jagne ki aadat ho gai hai

aur mohabbat ke liye ye umr ki daulat paDi hai

magar jab KHwahishon ke bandh aksar TuTte honge

to phir sailab mein

kya kya na bah kar kho gaya hoga

hazaron adh-khile arman bhi murjha gae honge

tabassum ne

kisi pal Das liya hoga labon ko gar

to sara zahar mauqa dekh kar

us ke badan mein raqs karta phir raha hoga

kabhi koyal ki kali kuk gar kanon mein pahunchi ho

to shiryanon mein bahta KHun sara jam gaya hoga

parae mard ka koi tasawwur chhune se pahle

wo laDki Dar gai hogi

achanak mar gai hogi