apni taswir mujhe aap banani hogi

mere fankār

''mujhe ḳhuub tarāshā tū ne

aañkh nīlam kī

badan chāñdī kā

yāqūt ke lab

ye tire

zauq-e-talab ke bhī haiñ

me.aar ajab

paaoñ meñ mere

ye pāzeb

sajā dī tū ne

nuqra.ī taar meñ āvāz muñDhā dī tū ne

ye javāhar se jaḌī

qīmtī mūrat merī

apne sāmān-e-ta.ayyush meñ lagā dī tū ne

maiñ ne maanā

ki hasīñ hai tirā shahkār

magar

tere shahkār meñ

mujh jaisī koī baat nahīñ

tujh ko nīlam sī

nazar aatī haiñ āñkheñ merī

dard ke in meñ samundar

nahīñ dekhe tū ne

tū ne

jab kī

lab o ruḳhsār kī ḳhattātī kī

jo varaq likkhe the

dil par

nahīñ dekhe tū ne

mere fankār

tire zauq

tire fan kā kamāl

mere pindār kī qīmat

na chukā pā.egā

tū ne but yā to tarāshe

yā tarāshe haiñ ḳhudā

tū bhalā kyā mirī tasvīr

banā pā.egā

tere aurāq se

ye shakl miTānī hogī

apnī tasvīr

mujhe aap banānī hogī

hosh bhī

jur.at-e-guftār bhī

bīnā.ī bhī

jur.at-e-ishq bhī hai

zabt kī ra.anā.ī bhī

jitne jauhar haiñ numū ke

mirī ta.amīr meñ haiñ

dekh ye rañg

jo taaza mirī tasvīr meñ haiñ

mere fankar

mujhe KHub tarasha tu ne

aankh nilam ki

badan chandi ka

yaqut ke lab

ye tere

zauq-e-talab ke bhi hain

mear ajab

paon mein mere

ye pazeb

saja di tu ne

nuqrai tar mein aawaz munDha di tu ne

ye jawahar se jaDi

qimti murat meri

apne saman-e-tayyush mein laga di tu ne

main ne mana

ki hasin hai tera shahkar

magar

tere shahkar mein

mujh jaisi koi baat nahin

tujh ko nilam si

nazar aati hain aankhen meri

dard ke in mein samundar

nahin dekhe tu ne

tu ne

jab ki

lab o ruKHsar ki KHattati ki

jo waraq likkhe the

dil par

nahin dekhe tu ne

mere fankar

tere zauq

tere fan ka kamal

mere pindar ki qimat

na chuka paega

tu ne but ya to tarashe

ya tarashe hain KHuda

tu bhala kya meri taswir

bana paega

tere auraq se

ye shakl miTani hogi

apni taswir

mujhe aap banani hogi

hosh bhi

jurat-e-guftar bhi

binai bhi

jurat-e-ishq bhi hai

zabt ki ranai bhi

jitne jauhar hain numu ke

meri tamir mein hain

dekh ye rang

jo taza meri taswir mein hain