aurat aur namak

izzat kī bahut sī qismeñ haiñ

ghūñghaT thappaḌ gandum

izzat ke tābūt meñ qaid kī meḳheñ Thoñkī ga.ī haiñ

ghar se le kar fōtpath tak hamārā nahīñ

izzat hamāre guzāre kī baat hai

izzat ke neze se hameñ dāġhā jaatā hai

izzat kī kanī hamārī zabān se shurūa hotī hai

koī raat hamārā namak chakh le

to ek zindagī hameñ be-zā.iqa roTī kahā jaatā hai

ye kaisā bāzār hai

ki rañg-sāz hī phīkā paḌā hai

ḳhalā kī hathelī pe patañgeñ mar rahī haiñ

maiñ qaid meñ bachche jantī huuñ

jaa.ez aulād ke liye zamīn khilanDarī honī chāhiye

tum Dar meñ bachche jantī ho isī liye aaj tumhārī koī nasl nahīñ

tum jism ke ek band se pukārī jaatī ho

tumhārī haisiyat meñ to chaal rakh dī ga.ī hai

ek ḳhūbsūrat chaal

chhoTī muskurāhaT tumhāre laboñ pe tarāsh dī ga.ī hai

tum sadiyoñ se nahīñ roiiñ

kyā maañ aisī hotī hai

tumhāre bachche phīke kyoñ paḌe haiñ

tum kis kumbe kī maañ ho

reip kī qaid kī baTe hue jism kī

yā īñToñ meñ chunī huī beTiyoñ kī

bāzāroñ meñ tumhārī beTiyāñ

apne lahū se bhuuk gūñdhtī haiñ

aur apnā gosht khātī haiñ

ye tumhārī kaun sī āñkheñ haiñ

ye tumhāre ghar kī dīvār kī kaun sī chinā.ī hai

tum ne merī hañsī meñ ta.āruf rakkhā

aur apne beTe kā naam sikka-e-rā.ij-ul-vaqt

aaj tumhārī beTī apnī beTiyoñ se kahtī hai

maiñ apnī beTī kī zabān dāġhūñgī

lahū thūktī aurat dhaat nahīñ

chūḌiyoñ kī chor nahīñ

maidān merā hausla hai

añgāra merī ḳhvāhish

ham sar pe kafan bāñdh kar paidā hue haiñ

koī añgūThī pahan kar nahīñ

jise tum chorī kar loge

izzat ki bahut si qismen hain

ghunghaT thappaD gandum

izzat ke tabut mein qaid ki meKHen Thonki gai hain

ghar se le kar footpath tak hamara nahin

izzat hamare guzare ki baat hai

izzat ke neze se hamein dagha jata hai

izzat ki kani hamari zaban se shurua hoti hai

koi raat hamara namak chakh le

to ek zindagi hamein be-zaiqa roTi kaha jata hai

ye kaisa bazar hai

ki rang-saz hi phika paDa hai

KHala ki hatheli pe patangen mar rahi hain

main qaid mein bachche janti hun

jaez aulad ke liye zamin khilanDari honi chahiye

tum Dar mein bachche janti ho isi liye aaj tumhaari koi nasl nahin

tum jism ke ek band se pukari jati ho

tumhaari haisiyat mein to chaal rakh di gai hai

ek KHubsurat chaal

chhoTi muskurahaT tumhaare labon pe tarash di gai hai

tum sadiyon se nahin roin

kya man aisi hoti hai

tumhaare bachche phike kyon paDe hain

tum kis kumbe ki man ho

reip ki qaid ki baTe hue jism ki

ya inTon mein chuni hui beTiyon ki

bazaron mein tumhaari beTiyan

apne lahu se bhuk gundhti hain

aur apna gosht khati hain

ye tumhaari kaun si aankhen hain

ye tumhaare ghar ki diwar ki kaun si chinai hai

tum ne meri hansi mein taaruf rakkha

aur apne beTe ka nam sikka-e-raij-ul-waqt

aaj tumhaari beTi apni beTiyon se kahti hai

main apni beTi ki zaban daghungi

lahu thukti aurat dhat nahin

chuDiyon ki chor nahin

maidan mera hausla hai

angara meri KHwahish

hum sar pe kafan bandh kar paida hue hain

koi anguThi pahan kar nahin

jise tum chori kar loge