nai aurat ka tarana

haañ darvāze par chaḌhī kunDī utaar lī ga.ī hai

magar darvāzoñ ko kholne ke liye

ḳhud hī chal kar jaanā hogā

āñkhoñ kī paTTī khol diye jaane par bhī

bīnā.ī ko nigāh kī aadat dhīre dhīre hī paḌtī hai

hoñToñ par lagī mohreñ haT jaane par bhī

bolne ke liye zabān ko alfāz kī mashq karānī hotī hai

āzād to dimāġh ko honā hai

sirf jism kī āzādī koī ma.anī nahīñ rakhtī

sar kī chādar se apnī barahnagī apne hāthoñ Dhaknī hogī

sar par taaj hai aur pairoñ meñ beḌiyāñ

kyā ajiib nahīñ lagtā

zinā se le kar aadhī gavāhī tak

be-shak ye charge-shēt bahut lambī hai

lekin mujhe is ke baare meñ sochne kī

na fursat hai na zarūrat

vaise bhī ye charge-shēt merī adam-maujūdgī meñ tayyār kī ga.ī thī

dushnām mile yā in.aam mujhe is se koī farq nahīñ paḌtā

mujhe to apne āzād hāthoñ se apne pairoñ kī beḌiyāñ haTā kar

is malgaje añdhere ko apnī palkoñ se baTor kar

kināre lagānā hai

darvāze tak jaanā hai

ki in band paTToñ se bāhar ek khulī fazā

merā intizār kar rahī hai

jahāñ maiñ kam-az-kam āzādī se saañs to le sakūñgī

haañ maiñ shahr meñ dāḳhil hone vaalī pahlī aurat huuñ

kahīñ bhī pahuñchne ke liye uThāyā huā

pahlā qadam

han darwaze par chaDhi kunDi utar li gai hai

magar darwazon ko kholne ke liye

KHud hi chal kar jaana hoga

aankhon ki paTTi khol diye jaane par bhi

binai ko nigah ki aadat dhire dhire hi paDti hai

honTon par lagi mohren haT jaane par bhi

bolne ke liye zaban ko alfaz ki mashq karani hoti hai

aazad to dimagh ko hona hai

sirf jism ki aazadi koi mani nahin rakhti

sar ki chadar se apni barahnagi apne hathon Dhakni hogi

sar par taj hai aur pairon mein beDiyan

kya ajib nahin lagta

zina se le kar aadhi gawahi tak

be-shak ye charge-sheet bahut lambi hai

lekin mujhe is ke bare mein sochne ki

na fursat hai na zarurat

waise bhi ye charge-sheet meri adam-maujudgi mein tayyar ki gai thi

dushnam mile ya inam mujhe is se koi farq nahin paDta

mujhe to apne aazad hathon se apne pairon ki beDiyan haTa kar

is malgaje andhere ko apni palkon se baTor kar

kinare lagana hai

darwaze tak jaana hai

ki in band paTTon se bahar ek khuli faza

mera intizar kar rahi hai

jahan main kam-az-kam aazadi se sans to le sakungi

han main shahr mein daKHil hone wali pahli aurat hun

kahin bhi pahunchne ke liye uThaya hua

pahla qadam