silsile sawalon ke

hazāroñ sadiyāñ guzar chukī haiñ

kisī samay meñ vo thī satvantī

kahīñ sāvitrī

kahīñ thī miirā

har ek yug meñ

aqīdatoñ kī lahar meñ bhīgī

tapasyā ke sehr meñ gum-sum

rivāyatoñ ke nashe meñ Duubī

tumhāre qadmoñ kī gard ko vo tilak banātī

diye jalātī thī naqsh-e-pā par

janam janam kā aTuuT rishta

nibāhe jaatī

hazāroñ sadiyoñ safar kiyā hai

nazar jamā.e

tumhāre pīchhe

tumhāre dukh par dukhī huī hai

tumhāre sukh par sukhī huī hai

magar batāo

hazāroñ sadiyoñ ke darmiyāñ koī aisā lamha

jo tum ne is ke liye jiyā ho

sivā.e aañsū ke koī jugnū

kabhī jo āñchal meñ jaḌ diyā ho

purāne bargad pe ek dhāgā

kahīñ to us ke bhī naam kā ho

añdherī tāqoñ pe us kī ḳhātir

rakhā huā bhī to ik diyā ho

nahīñ hai kuchh bhī

kahīñ nahīñ hai

vo apnī tārīḳh meñ tumhārā

likhe bhī gar naam

kis tarah se

hazaron sadiyan guzar chuki hain

kisi samay mein wo thi satwanti

kahin sawitri

kahin thi mera

har ek yug mein

aqidaton ki lahar mein bhigi

tapasya ke sehr mein gum-sum

riwayaton ke nashe mein Dubi

tumhaare qadmon ki gard ko wo tilak banati

diye jalati thi naqsh-e-pa par

janam janam ka aTuT rishta

nibahe jati

hazaron sadiyon safar kiya hai

nazar jamae

tumhaare pichhe

tumhaare dukh par dukhi hui hai

tumhaare sukh par sukhi hui hai

magar batao

hazaron sadiyon ke darmiyan koi aisa lamha

jo tum ne is ke liye jiya ho

siwae aansu ke koi jugnu

kabhi jo aanchal mein jaD diya ho

purane bargad pe ek dhaga

kahin to us ke bhi nam ka ho

andheri taqon pe us ki KHatir

rakha hua bhi to ek diya ho

nahin hai kuchh bhi

kahin nahin hai

wo apni tariKH mein tumhaara

likhe bhi gar nam

kis tarah se