diwali 1958

dīpāvalī aatī hai jo har saal phir aa.ī

paiġhām masarrat kā jahāñ ke liye laa.ī

maqsūd hai kuchh jashn bhī kuchh is se bhalā.ī

barsāt kā mausam gayā lāzim hai safā.ī

paiġhām-e-nafāsat hai ba-har-gām dīvālī

duniyā nahīñ bhūlī hai abhī raam kā aanā

furqat-zada bhaa.ī ko kaleje se lagānā

mushtāq thī ḳhilqat use dīdār dikhānā

phir ḳhalq kā fart-e-ḳhushī se jashn manānā

bichhḌoñ ko milāne kā hai paiġhām dīvālī

tā-sāl ye lāzim hai ki mehnat se kamā.eñ

kuchh nek-o-bad ayyām kī ḳhātir bhī bachā.eñ

har roz ḳhudā jitnī bhī taufīq de khā.eñ

phir saal ke tehvār pe ham jashn manā.eñ

ik saal kī mehnat kā hai in.aam dīvālī

bāzār meñ sajtī haiñ miThā.ī kī dukāneñ

khīloñ ke kahīñ Dher batāshoñ kī qatāreñ

miTTī ke khilaune haiñ jo muñh se abhī boleñ

har chiiz pe vo husn ki sab jaan ko vāreñ

hai dil kī ḳhushī jaan kā ārām dīvālī

raushan haiñ diye jaise zamīñ par hoñ sitāre

qindīl ke saa.e kahīñ bijlī ke bhabhūke

vo laxmī-pūjan vo aqīdat ke bulāve

tum aa ke raho ghar meñ ki raunaq hai tumhīñ se

tum aao to zulmat ko kare raam dīvālī

jo chāhte haiñ lakshmī ho jald hamārī

hai jitnī bhī daulat hameñ mil jaa.e vo saarī

tehvār ye juue se manāte haiñ juārī

ho haar ki ho jiit hai donoñ meñ hī ḳhvārī

un ke liye hai bā.is-e-ilzām dīvālī

vābasta dīvālī se haiñ maazī ke fasāne

kuchh shauq ke qisse bhī haiñ kuchh hijr ke sadme

kuchh bā.is-e-taskīñ haiñ 'shifā' aaj ke jalve

māhaul ye kab tak hai ise kyā koī jaane

hai rang meñ Duubī huī ik shaam dīvālī

dipawali aati hai jo har sal phir aai

paigham masarrat ka jahan ke liye lai

maqsud hai kuchh jashn bhi kuchh is se bhalai

barsat ka mausam gaya lazim hai safai

paigham-e-nafasat hai ba-har-gam diwali

duniya nahin bhuli hai abhi ram ka aana

furqat-zada bhai ko kaleje se lagana

mushtaq thi KHilqat use didar dikhana

phir KHalq ka fart-e-KHushi se jashn manana

bichhDon ko milane ka hai paigham diwali

ta-sal ye lazim hai ki mehnat se kamaen

kuchh nek-o-bad ayyam ki KHatir bhi bachaen

har roz KHuda jitni bhi taufiq de khaen

phir sal ke tehwar pe hum jashn manaen

ek sal ki mehnat ka hai inam diwali

bazar mein sajti hain miThai ki dukanen

khilon ke kahin Dher batashon ki qataren

miTTi ke khilaune hain jo munh se abhi bolen

har chiz pe wo husn ki sab jaan ko waren

hai dil ki KHushi jaan ka aaram diwali

raushan hain diye jaise zamin par hon sitare

qindil ke sae kahin bijli ke bhabhuke

wo laxmi-pujan wo aqidat ke bulawe

tum aa ke raho ghar mein ki raunaq hai tumhin se

tum aao to zulmat ko kare ram diwali

jo chahte hain lakshmi ho jald hamari

hai jitni bhi daulat hamein mil jae wo sari

tehwar ye jue se manate hain juari

ho haar ki ho jit hai donon mein hi KHwari

un ke liye hai bais-e-ilzam diwali

wabasta diwali se hain mazi ke fasane

kuchh shauq ke qisse bhi hain kuchh hijr ke sadme

kuchh bais-e-taskin hain 'shifa' aaj ke jalwe

mahaul ye kab tak hai ise kya koi jaane

hai rang mein Dubi hui ek sham diwali