eid ke roz

kaisī nikhrī sī nazar aatī hai fazā eid ke roz

shādmāñ phirte haiñ sab shāh-o-gadā eid ke roz

kitnī be-fikrī se gaate haiñ gadā rāhoñ meñ

peT ḳhālī ho to gaa.eñ bhī na kyā eid ke roz

kyā bhalī lagtī hai har pīr-o-javāñ ke muñh se

har taraf eid mubārak kī sadā eid ke roz

ammī ḳhush hoñgī aur eidī bhī vahī pā.egā

vaqt se pahle jo bedār huā eid ke roz

chāñd untīs ko kyā niklā ki aadhī shab se

tailoring shaap meñ ik tāñtā bañdhā eid ke roz

kapḌe bhī dhul na sake vaqt-e-namāz aa pahūñchā

laundry vāloñ pe aafat hai bapā eid ke roz

daadī ammāñ ne musalle ko pare Daal diyā

ghar meñ mehmānoñ kā vo shor machā eid ke roz

aañkh ojhal huī aur TuuT savayyoñ pe paḌā

der se aslam isī taak meñ thā eid ke roz

īd-gah shaan se Tam Tam pe chale haiñ babban

baap ke kāñdhoñ pe nanhā bhī chaḌhā eid ke roz

pakḌe lāThī ko maTakte chale ramzānī miyāñ

pīchhe se bachchoñ kā ik gol chalā eid ke roz

apne begāne jo baḌh baḌh ke gale milte hoñ

kyoñ na phir aa.e ibādat meñ maza eid ke roz

roze ramzān ke rakhnā to sabhī bhuul ga.e

kaise bhūleñge savayyoñ ko bhalā eid ke roz

saal ke saal rahe yād-e-ḳhudā se ġhāfil

ai 'zakī' un ko bhī yaad aayā ḳhudā eid ke roz

kaisi nikhri si nazar aati hai faza eid ke roz

shadman phirte hain sab shah-o-gada eid ke roz

kitni be-fikri se gate hain gada rahon mein

peT KHali ho to gaen bhi na kya eid ke roz

kya bhali lagti hai har pir-o-jawan ke munh se

har taraf eid mubarak ki sada eid ke roz

ammi KHush hongi aur eidi bhi wahi paega

waqt se pahle jo bedar hua eid ke roz

chand untis ko kya nikla ki aadhi shab se

tailoring shap mein ek tanta bandha eid ke roz

kapDe bhi dhul na sake waqt-e-namaz aa pahuncha

laundry walon pe aafat hai bapa eid ke roz

dadi amman ne musalle ko pare Dal diya

ghar mein mehmanon ka wo shor macha eid ke roz

aankh ojhal hui aur TuT sawayyon pe paDa

der se aslam isi tak mein tha eid ke roz

id-gah shan se Tam Tam pe chale hain babban

bap ke kandhon pe nanha bhi chaDha eid ke roz

pakDe laThi ko maTakte chale ramzani miyan

pichhe se bachchon ka ek gol chala eid ke roz

apne begane jo baDh baDh ke gale milte hon

kyon na phir aae ibaadat mein maza eid ke roz

roze ramzan ke rakhna to sabhi bhul gae

kaise bhulenge sawayyon ko bhala eid ke roz

sal ke sal rahe yaad-e-KHuda se ghafil

ai 'zaki' un ko bhi yaad aaya KHuda eid ke roz