id ka chand

Dūbtī shaam ke bāloñ meñ shafaq kī laalī

kitnī bichhḌī huī yādoñ ko milā detī hai

ḳhushbueñ surḳh gulāboñ kī mahak uThtī haiñ

chāñd sī shakl tamanna ko jilā detī hai

vo hī tasvīr vo hī rang vo hī tanhā.ī

merī vahshat meñ utarne lagī ḳhanjar ban kar

sab muñDeroñ pe khaḌe dekh rahe haiñ us ko

phir samāne lagī mujh meñ tirā paikar ban kar

maiñ ne chāhā thā ki maiñ tujh ko bhulā duuñ lekin

mujh se ye ho na sakā tujh se bhī ye ho na sakā

dil ne ma.asūm gulāboñ se jo khaa.e the vo zaḳhm

un ko siine meñ chhupā.e rahā maiñ dho na sakā

apne juuḌe meñ sajā.e hue bārīk sā chāñd

nuur kī shaam phir aa.ī hai charāġhāñ karne

jhilmilāte hue tāroñ kā hai ik haalā sā

raushnī utrī hai tajdīd-e-gulistāñ karne

roza-dāroñ ke tajassus se ye nikhrī huī shaam

aur is shaam meñ bachpan kī nigāhoñ kī talāsh

chāñd ke ruup meñ paane ke liye dil bechain

tere nazzāroñ kī aur terī panāhoñ kī talāsh

iid kā chāñd zamāne ne tujhe naam diyā

tere ruḳhsār kī letī haiñ balā.eñ āñkheñ

chāñdnī terī utar aa.egī har ik dil meñ

is qadar pyaar ki sharmā hī na jaa.eñ āñkheñ

chāñd ke ruup meñ pākīza tamannāoñ meñ

ḳhūb-rūī tirī allāh salāmat rakkhe

ye duā hai mirī mahbūb mire shauq kī jaañ

jab bhī tū ubhre to āñkhoñ meñ tarāvat rakhe

tū mirī bātoñ se sharmā ke na chhup jaanā kahīñ

iid kā chāñd hai to sab ko dikhā.ī denā

dil ke jazbāt tire saath haiñ ai nūr-e-hayāt

pyaar kā giit hai to sab ko sunā.ī denā

tere aane ke tasadduq tire jalvoñ ke nisār

paak lamhāt meñ hai ishq kī tā.īd kā din

ek shā.ir huuñ mire lafzoñ kā tohfa ho qubūl

iid kā chāñd mubārak ho tujhe iid kā din

Dubti sham ke baalon mein shafaq ki lali

kitni bichhDi hui yaadon ko mila deti hai

KHushbuen surKH gulabon ki mahak uThti hain

chand si shakl tamanna ko jila deti hai

wo hi taswir wo hi rang wo hi tanhai

meri wahshat mein utarne lagi KHanjar ban kar

sab munDeron pe khaDe dekh rahe hain us ko

phir samane lagi mujh mein tera paikar ban kar

main ne chaha tha ki main tujh ko bhula dun lekin

mujh se ye ho na saka tujh se bhi ye ho na saka

dil ne masum gulabon se jo khae the wo zaKHm

un ko sine mein chhupae raha main dho na saka

apne juDe mein sajae hue barik sa chand

nur ki sham phir aai hai charaghan karne

jhilmilate hue taron ka hai ek haala sa

raushni utri hai tajdid-e-gulistan karne

roza-daron ke tajassus se ye nikhri hui sham

aur is sham mein bachpan ki nigahon ki talash

chand ke rup mein pane ke liye dil bechain

tere nazzaron ki aur teri panahon ki talash

id ka chand zamane ne tujhe nam diya

tere ruKHsar ki leti hain balaen aankhen

chandni teri utar aaegi har ek dil mein

is qadar pyar ki sharma hi na jaen aankhen

chand ke rup mein pakiza tamannaon mein

KHub-rui teri allah salamat rakkhe

ye dua hai meri mahbub mere shauq ki jaan

jab bhi tu ubhre to aankhon mein tarawat rakhe

tu meri baaton se sharma ke na chhup jaana kahin

id ka chand hai to sab ko dikhai dena

dil ke jazbaat tere sath hain ai nur-e-hayat

pyar ka git hai to sab ko sunai dena

tere aane ke tasadduq tere jalwon ke nisar

pak lamhat mein hai ishq ki taid ka din

ek shair hun mere lafzon ka tohfa ho qubul

id ka chand mubarak ho tujhe id ka din