id ke roz

iid ke roz gale kis ko lagā.e koī

vo na hoñ paas to kyā iid manā.e koī

paas hote bhī agar mere to hāsil kyā thā

un ko ye zid hai gale se na lagā.e koī

dil ke dam se hai ḳhushī aur dil un ke dam se

dil ho vīrān to kyā dhuum machā.e koī

ḳhud to aate nahīñ aur yaad chalī aatī hai

iid ke roz mujhe yuuñ na satā.e koī

lazzat-e-vasl mayassar jo nahīñ iid ke din

hai ġham-e-hijr ko siine se lagā.e koī

qurb thā bā.is-e-āzār to phir ai dil-e-zār

duur rah kar bhī mujhe yaad na aa.e koī

iid ke roz masarrat kā taqāzā hai ki aaj

dil kī ujḌī huī nagrī ko basā.e koī

iid kā roz bhī har din ke barābar hai mujhe

iid ke roz bhī gar muñh na dikhā.e koī

kaash ik baar vo is shaan se aa jaa.eñ 'jalīl'

ġhaur karne pe bhī pahchān na paa.e koī

id ke roz gale kis ko lagae koi

wo na hon pas to kya id manae koi

pas hote bhi agar mere to hasil kya tha

un ko ye zid hai gale se na lagae koi

dil ke dam se hai KHushi aur dil un ke dam se

dil ho viran to kya dhum machae koi

KHud to aate nahin aur yaad chali aati hai

id ke roz mujhe yun na satae koi

lazzat-e-wasl mayassar jo nahin id ke din

hai gham-e-hijr ko sine se lagae koi

qurb tha bais-e-azar to phir ai dil-e-zar

dur rah kar bhi mujhe yaad na aae koi

id ke roz masarrat ka taqaza hai ki aaj

dil ki ujDi hui nagri ko basae koi

id ka roz bhi har din ke barabar hai mujhe

id ke roz bhi gar munh na dikhae koi

kash ek bar wo is shan se aa jaen 'jalil'

ghaur karne pe bhi pahchan na pae koi