lahu ke charagh

charāġh itne jalāo zamīñ ke māthe par

siyāh raat ke āñchal ko nuur se bhar do

ujālā chāñd sitāroñ kā maañd paḌ jaa.e

falak kī raushnī is raushnī meñ gum kar do

ye raat saal meñ bas ek baar aatī hai

is ek raat pe qurbān zindagī kar do

jalā ke apne lahū ke charāġh ai logo

jahāñ-jahāñ bhī añdherā hai raushnī kar do

jo diip jaltā hai mandir meñ raushnī ke liye

vahī to sehn-e-haram ko bhī jagmagātā hai

jo farq ham ne kiyā hai rahīm-o-rām ke biich

usī ḳhalīj usī farq ko miTātā hai

ujālā jis kā koī dharm hai na maz.hab hai

baġhair farq sabhī ko gale lagātā hai

sanam-kada ho haram ho ki bazm-e-mai-ḳhāna

har ik ke gosha-e-zulmat ko jagmagātā hai

charagh itne jalao zamin ke mathe par

siyah raat ke aanchal ko nur se bhar do

ujala chand sitaron ka mand paD jae

falak ki raushni is raushni mein gum kar do

ye raat sal mein bas ek bar aati hai

is ek raat pe qurban zindagi kar do

jala ke apne lahu ke charagh ai logo

jahan-jahan bhi andhera hai raushni kar do

jo dip jalta hai mandir mein raushni ke liye

wahi to sehn-e-haram ko bhi jagmagata hai

jo farq hum ne kiya hai rahim-o-ram ke bich

usi KHalij usi farq ko miTata hai

ujala jis ka koi dharm hai na mazhab hai

baghair farq sabhi ko gale lagata hai

sanam-kada ho haram ho ki bazm-e-mai-KHana

har ek ke gosha-e-zulmat ko jagmagata hai