fikr

nahīñ har chand kisī gum-shuda jannat kī talāsh

ik na ik ḳhuld-e-tarab-nāk kā armāñ hai zarūr

bazm-e-doshamba kī hasrat to nahīñ hai mujh ko

merī nazroñ meñ koī aur shabistāñ hai zarūr

miT ke barbād-e-jahāñ ho ke sabhī kuchh kho ke

baat kyā hai ki ziyāñ kā koī ehsās nahīñ

kār-farmā hai koī taaza junūn-e-ta.amīr

dil-e-muztar abhī amāg-gah-e-yās nahīñ

tāza-dam bhī huuñ magar phir ye taqāzā kyuuñ hai

haath rakh de mire māthe pe koī zohra-jabīñ

ek āġhosh-e-hasīñ shauq kī merāj hai kyā

kyā yahī hai asar-e-nāla-e-dil-hā-e-hazīñ

mah-vashoñ kā tarab-añgez tabassum kyā hai

hai to sab kuchh ye magar ḳhvāb asar kyuuñ ho jaa.e

husn kī jalva-gah-e-nāz kā afsūñ taslīm

yahī qurbāñ-gah-e-arbāb-e-nazar kyuuñ ho jaa.e

maiñ ne sochā thā ki dushvār hai manzil apnī

ik hasīñ bāzu-e-sīmīñ kā sahārā bhī to hai

dasht-e-zulmāt se āḳhir ko guzarnā hai mujhe

koī raḳhshanda o tābinda sitāra bhī to hai

aag ko kis ne gulistāñ na banānā chāhā

jal bujhe kitne ḳhalīl aag gulistāñ na banī

TuuT jaanā dar-e-zindāñ kā to dushvār na thā

ḳhud zuleḳhā hī rafīq-e-mah-e-kan.āñ na banī

ba-īñ in.ām-e-vafā uf ye taqāza-e-hayāt

zindagī vaqf-e-ġham-e-ḳhāk-nashīnañ kar de

ḳhūn-e-dil kī koī qīmat jo nahīñ hai to na ho

ḳhūn-e-dil nazr-e-chaman-bandi-e-daurāñ kar de

nahin har chand kisi gum-shuda jannat ki talash

ek na ek KHuld-e-tarab-nak ka arman hai zarur

bazm-e-doshamba ki hasrat to nahin hai mujh ko

meri nazron mein koi aur shabistan hai zarur

miT ke barbaad-e-jahan ho ke sabhi kuchh kho ke

baat kya hai ki ziyan ka koi ehsas nahin

kar-farma hai koi taza junun-e-tamir

dil-e-muztar abhi amag-gah-e-yas nahin

taza-dam bhi hun magar phir ye taqaza kyun hai

hath rakh de mere mathe pe koi zohra-jabin

ek aaghosh-e-hasin shauq ki meraj hai kya

kya yahi hai asar-e-nala-e-dil-ha-e-hazin

mah-washon ka tarab-angez tabassum kya hai

hai to sab kuchh ye magar KHwab asar kyun ho jae

husn ki jalwa-gah-e-naz ka afsun taslim

yahi qurban-gah-e-arbab-e-nazar kyun ho jae

main ne socha tha ki dushwar hai manzil apni

ek hasin bazu-e-simin ka sahaara bhi to hai

dasht-e-zulmat se aaKHir ko guzarna hai mujhe

koi raKHshanda o tabinda sitara bhi to hai

aag ko kis ne gulistan na banana chaha

jal bujhe kitne KHalil aag gulistan na bani

TuT jaana dar-e-zindan ka to dushwar na tha

KHud zuleKHa hi rafiq-e-mah-e-kanan na bani

ba-in inam-e-wafa uf ye taqaza-e-hayat

zindagi waqf-e-gham-e-KHak-nashinan kar de

KHun-e-dil ki koi qimat jo nahin hai to na ho

KHun-e-dil nazr-e-chaman-bandi-e-dauran kar de