ghaalib

'ġhālib' terā kalām navā-e-sarosh hai

ilhām-e-ġhaib-o-naġhma-e-sāz-e-ḳhamosh hai

aisā bharā huā hai ġhazal meñ siñgār-ras

ik jannat-e-samā.a hai firdaus-e-gosh hai

āsāñ nahīñ jamāl-e-ma.ānī kā dekhnā

har shāhid-e-ḳhayāl tirā pardā-posh hai

jo baat hai vo shoḳhī-e-guldasta-e-chaman

jo lafz hai bahār-e-kaf-e-gul-farsoh hai

mauj-e-ravāñ haiñ misra-e-be-sāḳhta tire

bahr-e-suḳhan meñ bahr-e-mohabbat kā josh hai

in motiyoñ kī qadr hai shāhoñ ke taaj meñ

parkhe nazar se un ko jo gauhar-farosh hai

kaif-e-suḳhan se mast huuñ terī ġhazal sunīñ

is bazm meñ jinheñ havas-e-nāv-nosh hai

tū ne chaman chaman meñ shagūfe khilā diye

fitrat tire kalām kī gulshan-ba-dosh hai

afsūñ-tarāziyāñ tirī muñh kī latī rahīñ

gul kī zabān band hai ġhuncha ḳhamosh hai

baalā terā maqām duniyā-e-sher meñ

'urfī' bhī ek banda-e-halqa-e-ba-gosh hai

duniyā tire ḳhayāl meñ hai chashma-e-sarāb

rañgīnī-e-nishāt-o-tarab ḳhvāb-e-dosh hai

terī nazar meñ shāhid-o-mash.hūd ek haiñ

duniyā-e-be-ḳhudī tujhe duniyā-e-hosh hai

daana tirī nigāh meñ thā ḳhirman-e-murād

tujh ko ḳhabar thī qatre meñ dariyā kā josh hai

dair-o-haram pe bhī nahīñ ye raaz munkashif

harf-e-azal hai kaun jo ma.anā-farosh hai

afsurda daaġh se hai tire mahfil-e-adab

ne vo surūr-o-soz na josh-o-ḳharosh hai

kitnī tire mazār pe chhā.ī hai bekasī

ik sham.a ashk-rez thī vo bhī ḳhamosh hai

chhalkī jo thī kabhī tire rañgīñ ayāġh se

'kaifī' usī sharāb kā ik jur.a-nosh hai

'ghaalib' tera kalam nawa-e-sarosh hai

ilham-e-ghaib-o-naghma-e-saz-e-KHamosh hai

aisa bhara hua hai ghazal mein singar-ras

ek jannat-e-samaa hai firdaus-e-gosh hai

aasan nahin jamal-e-maani ka dekhna

har shahid-e-KHayal tera parda-posh hai

jo baat hai wo shoKHi-e-guldasta-e-chaman

jo lafz hai bahaar-e-kaf-e-gul-farsoh hai

mauj-e-rawan hain misra-e-be-saKHta tere

bahr-e-suKHan mein bahr-e-mohabbat ka josh hai

in motiyon ki qadr hai shahon ke taj mein

parkhe nazar se un ko jo gauhar-farosh hai

kaif-e-suKHan se mast hun teri ghazal sunin

is bazm mein jinhen hawas-e-naw-nosh hai

tu ne chaman chaman mein shagufe khila diye

fitrat tere kalam ki gulshan-ba-dosh hai

afsun-taraaziyan teri munh ki lati rahin

gul ki zaban band hai ghuncha KHamosh hai

baala tera maqam duniya-e-sher mein

'urfi' bhi ek banda-e-halqa-e-ba-gosh hai

duniya tere KHayal mein hai chashma-e-sarab

rangini-e-nishat-o-tarab KHwab-e-dosh hai

teri nazar mein shahid-o-mashhud ek hain

duniya-e-be-KHudi tujhe duniya-e-hosh hai

dana teri nigah mein tha KHirman-e-murad

tujh ko KHabar thi qatre mein dariya ka josh hai

dair-o-haram pe bhi nahin ye raaz munkashif

harf-e-azal hai kaun jo mana-farosh hai

afsurda dagh se hai tere mahfil-e-adab

ne wo surur-o-soz na josh-o-KHarosh hai

kitni tere mazar pe chhai hai bekasi

ek shama ashk-rez thi wo bhi KHamosh hai

chhalki jo thi kabhi tere rangin ayagh se

'kaifi' usi sharab ka ek jura-nosh hai