ghaalib

tum ye kahte ho ki qaa.il nahīñ aslāf kā maiñ

sach hai ye daur bhī aslāf parastī kā nahīñ

aaj har jaam se labrez mai-e-hastī se

jām-e-dīroz meñ ye bāda-e-rañgīñ hai kahīñ

tum ne samjhā hī nahīñ falsafa-e-zīst hai kyā

kab maiñ kahtā huuñ ki jhuTlā do guzishta lamhe

maiñ ne to aur bhī chamkā.e haiñ maazī ke nuqūsh

gul kiye hoñge tumhīñ ne ga.e vaqtoñ ke diye

maiñ is aflās-zada daur se bach kar ai dost

likh nahīñ saktā kisī haal meñ bosīda adab

aur ye bhī nahīñ ho saktā ki maiñ pesh karūñ

be-tap-o-tāp-o-parāganda-o-zūlīda adab

kal jo thā tarz-e-jahāñ aaj kahāñ hai baaqī

saath de saktī nahīñ aaj kā vo rasm-e-kohan

kal to kuchh aur hī thī lauh-o-qalam kī duniyā

aaj kuchh aur hai dīvānoñ kā andāz-e-suḳhan

mere afkār pe kahte ho ki hai mohr lagī

'hāfiz'-o-'sādī' bhī haiñ ahd-e-guzishta ke adiib

tum hī batlāo ki martā hai kahīñ aisā adab

jo rahā ho ġham-e-hastī ġham-e-daurāñ ke qarīb

ishq aur husn ke afsānoñ meñ kyā rakkhā hai

sun ke un qissoñ ko bīmār nahīñ jī sakte

jis meñ sharbat ho faqat bāda-e-tiryāq na ho

aaj us jaam ko mai-ḳhvār nahīñ pī sakte

mere dil meñ bhī aqīdat kā diyā jaltā hai

ho 'zuhūrī'-o-'nazīrī' kī ho 'tālib' kā kalām

'keats' 'tagore' ki 'iqbāl' hoñ 'tulsī' hoñ ki 'mīr'

sab se 'ġhālib' ko judā rakhtā hai 'ġhālib' kā kalām

aaj bhī hazrat-e-ġhālib kā qalam zinda hai

us se miltā hai abhī jis kī zarūrat hai hameñ

aaj ke daur meñ bhī taaza haiñ afkār us ke

ye alag baat ki us se bhī kudūrat hai hameñ

tum ye kahte ho ki qail nahin aslaf ka main

sach hai ye daur bhi aslaf parasti ka nahin

aaj har jam se labrez mai-e-hasti se

jam-e-diroz mein ye baada-e-rangin hai kahin

tum ne samjha hi nahin falsafa-e-zist hai kya

kab main kahta hun ki jhuTla do guzishta lamhe

main ne to aur bhi chamkae hain mazi ke nuqush

gul kiye honge tumhin ne gae waqton ke diye

main is aflas-zada daur se bach kar ai dost

likh nahin sakta kisi haal mein bosida adab

aur ye bhi nahin ho sakta ki main pesh karun

be-tap-o-tap-o-paraganda-o-zulida adab

kal jo tha tarz-e-jahan aaj kahan hai baqi

sath de sakti nahin aaj ka wo rasm-e-kohan

kal to kuchh aur hi thi lauh-o-qalam ki duniya

aaj kuchh aur hai diwanon ka andaz-e-suKHan

mere afkar pe kahte ho ki hai mohr lagi

'hafiz'-o-'sadi' bhi hain ahd-e-guzishta ke adib

tum hi batlao ki marta hai kahin aisa adab

jo raha ho gham-e-hasti gham-e-dauran ke qarib

ishq aur husn ke afsanon mein kya rakkha hai

sun ke un qisson ko bimar nahin ji sakte

jis mein sharbat ho faqat baada-e-tiryaq na ho

aaj us jam ko mai-KHwar nahin pi sakte

mere dil mein bhi aqidat ka diya jalta hai

ho 'zuhuri'-o-'naziri' ki ho 'talib' ka kalam

'keats' 'tagore' ki 'iqbaal' hon 'tulsi' hon ki 'mir'

sab se 'ghaalib' ko juda rakhta hai 'ghaalib' ka kalam

aaj bhi hazrat-e-ghaalib ka qalam zinda hai

us se milta hai abhi jis ki zarurat hai hamein

aaj ke daur mein bhi taza hain afkar us ke

ye alag baat ki us se bhi kudurat hai hamein