gamzan

kabhī retīle ḳhushk maidān meñ

koī bādal kā āvāra TukḌā

kisī ghar se bhāge hue pyāre bachche kī mānind

āvārgī kartā kartā

zamānoñ se sūkhī huī ret ko pyaar se dekhtā hai

vo achchhī tarah jāntā hai

ki is ret ke ḳhushk siine meñ dil hai

jo apnī tabāhī pe rotā nahīñ hai

jo kahtā nahīñ hai

ki ''aao mujhe is gaḌhe se nikālo

mire muñh ko dho kar

mirī maañg meñ sabz pattoñ kā chandan bharo''

vo bādal kā āvāra TukḌā

jo bachchoñ kī mānind ma.asūm hai

apnī kājal lagī bhīgī āñkhoñ se us kī taraf dekhtā hai

vo rotā hai

aur us ke aañsū

sulagtī huī ret ke ḳhushk siine meñ halchal machāte haiñ

ḳhushbū luTāte haiñ

aur un kī ḳhushbū

musāfir akele musāfir se kahtī hai

chalte raho

abhī zindagī meñ namī hai

abhī sard jhoñkoñ kā sailāb soyā nahīñ hai

kabhi retile KHushk maidan mein

koi baadal ka aawara TukDa

kisi ghar se bhage hue pyare bachche ki manind

aawargi karta karta

zamanon se sukhi hui ret ko pyar se dekhta hai

wo achchhi tarah jaanta hai

ki is ret ke KHushk sine mein dil hai

jo apni tabahi pe rota nahin hai

jo kahta nahin hai

ki aao mujhe is gaDhe se nikalo

mere munh ko dho kar

meri mang mein sabz patton ka chandan bharo

wo baadal ka aawara TukDa

jo bachchon ki manind masum hai

apni kajal lagi bhigi aankhon se us ki taraf dekhta hai

wo rota hai

aur us ke aansu

sulagti hui ret ke KHushk sine mein halchal machate hain

KHushbu luTate hain

aur un ki KHushbu

musafir akele musafir se kahti hai

chalte raho

abhi zindagi mein nami hai

abhi sard jhonkon ka sailab soya nahin hai