gandhi-jayanti par

uThī chāroñ taraf se jab ki zulm-o-jabr kī āñdhī

payām-e-amn le kar aa ga.e rūh-e-zamāñ gāñdhī

bane hindostāñ ke vāste vo rahbar-e-kāmil

tavassul se unhī ke paa.ī ham ne apnī ḳhud manzil

huī raushan ujāle se dayār-e-hind kī vaadī

jalā.ī is tarah kī aap ne ik sham-e-āzādī

unhī ne jabr se añgrez ke ham ko chhuḌāyā thā

sadāqat kā sharāfat kā hameñ rasta batāyā thā

dikhā.ī raah vo ham ko jo gautam ne dikhā.ī thī

batā.ī baat vo phir se jo iisā ne batā.ī thī

uḳhuvvat ke vo dariyā the mohabbat ke vo sāhil the

ahinsā ke vo daa.ī the vo yak-jehtī ke qaa.il the

sabaq phir se paḌhāyā thā jahāñ-bhar ko bhalā.ī kā

zamāna aaj bhī mashkūr hai us haq ke daa.ī kā

ġharīboñ kī nahīfoñ kī hamesha dast-gīrī kī

na parvā kī musībat kī na parvā kī asīrī kī

hamāre dil munavvar kar diye nūr-e-mohabbat se

hue āgāh ahl-e-dahr ramz-e-ādamiyat se

vatan ke āsmāñ par ek raḳhshanda sitāre the

hameñ ye faḳhr hai ahl-e-jahāñ gāñdhī hamāre the

uThi chaaron taraf se jab ki zulm-o-jabr ki aandhi

payam-e-amn le kar aa gae ruh-e-zaman gandhi

bane hindostan ke waste wo rahbar-e-kaamil

tawassul se unhi ke pai hum ne apni KHud manzil

hui raushan ujale se dayar-e-hind ki wadi

jalai is tarah ki aap ne ek sham-e-azadi

unhi ne jabr se angrez ke hum ko chhuDaya tha

sadaqat ka sharafat ka hamein rasta bataya tha

dikhai rah wo hum ko jo gautam ne dikhai thi

batai baat wo phir se jo isa ne batai thi

uKHuwwat ke wo dariya the mohabbat ke wo sahil the

ahinsa ke wo dai the wo yak-jehti ke qail the

sabaq phir se paDhaya tha jahan-bhar ko bhalai ka

zamana aaj bhi mashkur hai us haq ke dai ka

gharibon ki nahifon ki hamesha dast-giri ki

na parwa ki musibat ki na parwa ki asiri ki

hamare dil munawwar kar diye nur-e-mohabbat se

hue aagah ahl-e-dahr ramz-e-adamiyat se

watan ke aasman par ek raKHshanda sitare the

hamein ye faKHr hai ahl-e-jahan gandhi hamare the