ganw ki saDak

ye des muflis-o-nādār kaj-kulāhoñ kā

ye des be-zar-o-dīnār bādshāhoñ kā

ki jis kī ḳhaak meñ qudrat hai kīmiyā.ī kī

ye nāibān-e-ḳhudāvand-e-arz kā maskan

ye nek paak buzurgoñ kī ruuh kā madfan

jahāñ pe chāñd sitāroñ ne jubba-sā.ī kī

na jaane kitne zamānoñ se is kā har rasta

misāl-e-ḳhāna-e-be-ḳhānumāñ thā darbasta

ḳhushā ki aaj ba-fazl-e-ḳhudā vo din aayā

ki dast-e-ġhaib ne is ghar kī dar-kushā.ī kī

chune ga.e haiñ sabhī ḳhaar is kī rāhoñ se

sunī ga.ī hai bil-āḳhir barahna-pā.ī kī

ye des muflis-o-nadar kaj-kulahon ka

ye des be-zar-o-dinar baadshahon ka

ki jis ki KHak mein qudrat hai kimiyai ki

ye naiban-e-KHudawand-e-arz ka maskan

ye nek pak buzurgon ki ruh ka madfan

jahan pe chand sitaron ne jubba-sai ki

na jaane kitne zamanon se is ka har rasta

misal-e-KHana-e-be-KHanuman tha darbasta

KHusha ki aaj ba-fazl-e-KHuda wo din aaya

ki dast-e-ghaib ne is ghar ki dar-kushai ki

chune gae hain sabhi KHar is ki rahon se

suni gai hai bil-aKHir barahna-pai ki