gayon ka jalsa

ik roz kisī gaay ke jī meñ ye samāyā

insān ne ham ko to burī tarah satāyā

lāzim hai ki ik jalsa kare qaum hamārī

aur aa ke sharīk us meñ ho har apnā parāyā

tajvīz hoñ is zulm se bachne ke tarīqe

har roz kī saḳhtī se to dam naak meñ aayā

kuchh aur bhī gaa.eñ jo vahāñ paas thiiñ maujūd

us gaay ne un sab ko bhī ye bhed batāyā

bas ho ga.ī phir jalse kī tārīḳh muqarrar

un gāyoñ ne is meñ baḌī gāyoñ ko bulāyā

jab aa ke vahāñ baiTh ga.iiñ saiñkaḌoñ gaa.eñ

ik gaay ko is jalse kā sardār banāyā

ik gaay ne phir uTh ke kahā suntī ho bahno

insān ne ham ko to bahut naach nachāyā

ab baḌh ga.e haiñ zulm-o-sitam had se ziyāda

kar Daalā hai zālim ne hazāroñ kā safāyā

daane kā to kyā zikr nahīñ ghaas bhī miltī

bhūke rahe fāqoñ ne hameñ ḳhuub ghulāyā

is tarah jo kamzor hue ham to sitam hai

zālim ne qasā.ī se hameñ zab.h karāyā

mochī ke havāle huī phir khaal hamārī

afsos hai us ne bhī to juutā hī banāyā

bas is se ziyāda bhī na hogī koī zillat

afsos hai pahle se hameñ dhyān na aayā

insān ne kuchh qadr na kī ranj hai is kā

ghī ham ne khilāyā use aur duudh pilāyā

behtar hai ki ab chhoḌ deñ ham us se ta.alluq

jangal meñ raheñ shahar meñ kuchh chain na paayā

ghaas aur hare khet chareñ apnī ḳhushī se

āzād hoñ kyoñ jaan ko ye rog lagāyā

taqrīr huī ḳhatm to ik niilī sī gaay

jhuñjhlā ke uThī aur use ġhussa bahut aayā

kahne lagī sun ai mirī pur-josh bahan sun

insān kā jo zulm-o-sitam tū ne jatāyā

insāf se dekho to ye hai farq samajh kā

ehsān jo us kā hai vo kyoñ dil se bhulāyā

vo raat ko detā hai hameñ vaqt pe chāra

sardī ho to kartā hai hamāre liye saayā

barsāt meñ machchhar bhī uḌātā hai dho.eñ se

us ne hameñ taklīf se aur dukh se bachāyā

har tarah se kartā hai hifāzat vo hamārī

kyā ho gayā ham ne jo use duudh pilāyā

jangal meñ ye ārām ye rāhat nahīñ hargiz

tauba karo tauba ye hai kyā jī meñ samāyā

jangal meñ to haiñ sher bhī chīte bhī hazāroñ

khā jaa.eñ hameñ phaaḌ ke kar Dāleñ safāyā

sardī ho to jangal meñ nahīñ koTharī koī

bārish ho to chhappar hai koī chhat hai na saaya

insān hamāre liye rāhat kā sabab hai

bas ham ne use sun liyā jo tum ne sunāyā

achchhī nahīñ nāshukr-guzārī kī ye bāteñ

afsos hai jalse meñ yahīñ vaqt gañvāyā

insān ne kuchh zulm bhī ham par kiye be-shak

lekin na bachā us se koī apnā parāyā

jo apne hī ham-jinsoñ ke ho ḳhuun kā pyāsā

kyā shikva agar ham pe use rahm na aayā

ai bahno munāsib hai ki tum sabr karo ab

kahte haiñ ḳhudā ko bhī to ye sabr hai bhāyā

us gaay kī taqrīr se chup ho ga.ī gaa.eñ

phir sab ne kahā Thiik hai jo tum ne batāyā

ek roz kisi gay ke ji mein ye samaya

insan ne hum ko to buri tarah sataya

lazim hai ki ek jalsa kare qaum hamari

aur aa ke sharik us mein ho har apna paraya

tajwiz hon is zulm se bachne ke tariqe

har roz ki saKHti se to dam nak mein aaya

kuchh aur bhi gaen jo wahan pas thin maujud

us gay ne un sab ko bhi ye bhed bataya

bas ho gai phir jalse ki tariKH muqarrar

un gayon ne is mein baDi gayon ko bulaya

jab aa ke wahan baiTh gain sainkaDon gaen

ek gay ko is jalse ka sardar banaya

ek gay ne phir uTh ke kaha sunti ho bahno

insan ne hum ko to bahut nach nachaya

ab baDh gae hain zulm-o-sitam had se ziyaada

kar Dala hai zalim ne hazaron ka safaya

dane ka to kya zikr nahin ghas bhi milti

bhuke rahe faqon ne hamein KHub ghulaya

is tarah jo kamzor hue hum to sitam hai

zalim ne qasai se hamein zabh karaya

mochi ke hawale hui phir khaal hamari

afsos hai us ne bhi to juta hi banaya

bas is se ziyaada bhi na hogi koi zillat

afsos hai pahle se hamein dhyan na aaya

insan ne kuchh qadr na ki ranj hai is ka

ghi hum ne khilaya use aur dudh pilaya

behtar hai ki ab chhoD den hum us se talluq

jangal mein rahen shahar mein kuchh chain na paya

ghas aur hare khet charen apni KHushi se

aazad hon kyon jaan ko ye rog lagaya

taqrir hui KHatm to ek nili si gay

jhunjhla ke uThi aur use ghussa bahut aaya

kahne lagi sun ai meri pur-josh bahan sun

insan ka jo zulm-o-sitam tu ne jataya

insaf se dekho to ye hai farq samajh ka

ehsan jo us ka hai wo kyon dil se bhulaya

wo raat ko deta hai hamein waqt pe chaara

sardi ho to karta hai hamare liye saya

barsat mein machchhar bhi uData hai dhoen se

us ne hamein taklif se aur dukh se bachaya

har tarah se karta hai hifazat wo hamari

kya ho gaya hum ne jo use dudh pilaya

jangal mein ye aaram ye rahat nahin hargiz

tauba karo tauba ye hai kya ji mein samaya

jangal mein to hain sher bhi chite bhi hazaron

kha jaen hamein phaD ke kar Dalen safaya

sardi ho to jangal mein nahin koThari koi

barish ho to chhappar hai koi chhat hai na saya

insan hamare liye rahat ka sabab hai

bas hum ne use sun liya jo tum ne sunaya

achchhi nahin nashukr-guzari ki ye baaten

afsos hai jalse mein yahin waqt ganwaya

insan ne kuchh zulm bhi hum par kiye be-shak

lekin na bacha us se koi apna paraya

jo apne hi ham-jinson ke ho KHun ka pyasa

kya shikwa agar hum pe use rahm na aaya

ai bahno munasib hai ki tum sabr karo ab

kahte hain KHuda ko bhi to ye sabr hai bhaya

us gay ki taqrir se chup ho gai gaen

phir sab ne kaha Thik hai jo tum ne bataya