غم فیضؔ

محفل شعر و سخن دوستو بے فیض ہوئی

گل کرو شمعیں چراغوں کی لویں زخمی کرو

ریت بالوں میں بھرو

چاک گریباں کر لو

رات ڈھلنے لگی

تاروں کے بدن دکھنے لگے

صبح کی آنکھوں سے رسنے لگا

سورج کا لہو

آہٹیں کھو گئیں

دھندلا گئے قدموں کے نشاں

اجنبی خاک میں گم ہو گیا تاروں کا جہاں

آ کے منزل پہ بہکنے لگے رہرو کے قدم

لڑکھڑانے لگے امیدوں کے خوابیدہ صنم

راستے سو گئے محرومیاں آنکھوں میں لئے

ٹمٹمانے لگے ہونٹوں پہ دعاؤں کے دیے

بجھ گیا آج وہی شعر و سخن کا مہتاب

تیسری دنیا میں تھی روشنی جس کے دم سے

جس نے بخشے تھے غریبوں کو

نئے عزم نئے حوصلے جینے کے لئے

جس نے محنت کشوں مزدوروں کے غم کو سمجھا

جس نے کچلے ہوئے انسانوں کے دکھ کو جانا

جس نے انساں کی بقا کے لئے

جیلیں کاٹیں

جس نے آواز اٹھائی تھی تشدد کے خلاف

جس نے اظہار کیا امن کا سچائی کا

جس نے پیغام دیا حسن کا انصاف کا

رعنائی کا

جس کے اشعار میں تھی فکر و عمل کی تلقین

جس کے اشعار میں تھی شدت احساس جمال

جس کے کردار میں آفاقیت

اور لہجے میں

رجائیت تھی

جس کے ہونٹوں پہ محبت کے ترانے گونجے

جس کے اشعار میں مفلس کے فسانے گونجے

حیف صد حیف وہ شاعر و مفکر نہ رہا

آج بیروت کے مظلوموں کا ذاکر نہ رہا

دوستو آؤ چلو سونی ہوئی بزم سخن

عمر بھر ایک یہی غم ہمیں تڑپائے گا

اپنے بے خواب کواڑوں کو مقفل کر لو

اب یہاں کوئی نہیں کوئی آئے آئے گا