gang-o-jaman ki KHushbu

sub.h-dam aatī hai ai hind tire āñchal se

hamd kī na.at kī puujā kī bhajan kī ḳhushbū

dhaḌkanoñ ne yahāñ chheḌī hai mohabbat kī ġhazal

hai fazāoñ meñ uḳhuvvat ke saman kī ḳhushbū

tere dāman meñ ajantā-o-hasīñ-tāj-mahal

tere khetoñ meñ hai dahqāñ ke jatan kī ḳhushbū

tere jharnoñ se ubharte haiñ tarāne dilkash

ruuh sarshār kare dasht-o-daman kī ḳhushbū

'mīr'-o-'ġhālib' hoñ ki 'iqbāl' yā 'chakbast'-o-'firāq'

terī miTTī meñ basī in ke suḳhan kī ḳhushbū

rang kī nasl kī tahzīb kī hai qaus-e-quzah

hai kahāñ dahr meñ ye gang-o-jaman kī ḳhushbū

mujh ko ġhurbat meñ bhī ehsās-e-vatan hotā hai

jab bhī laatī hai sabā mere vatan kī ḳhushbū

terī miTTī pe tasadduq haiñ dil-o-jān sabhī

bhuul sakte nahīñ ham tere manan kī ḳhushbū

tere hoñToñ pe tabassum kī dhanak khultī rahe

sadā ābād rahe tere chaman kī ḳhushbū

subh-dam aati hai ai hind tere aanchal se

hamd ki nat ki puja ki bhajan ki KHushbu

dhaDkanon ne yahan chheDi hai mohabbat ki ghazal

hai fazaon mein uKHuwwat ke saman ki KHushbu

tere daman mein ajanta-o-hasin-taj-mahal

tere kheton mein hai dahqan ke jatan ki KHushbu

tere jharnon se ubharte hain tarane dilkash

ruh sarshaar kare dasht-o-daman ki KHushbu

'mir'-o-'ghaalib' hon ki 'iqbaal' ya 'chakbast'-o-'firaq'

teri miTTi mein basi in ke suKHan ki KHushbu

rang ki nasl ki tahzib ki hai qaus-e-quzah

hai kahan dahr mein ye gang-o-jaman ki KHushbu

mujh ko ghurbat mein bhi ehsas-e-watan hota hai

jab bhi lati hai saba mere watan ki KHushbu

teri miTTi pe tasadduq hain dil-o-jaan sabhi

bhul sakte nahin hum tere manan ki KHushbu

tere honTon pe tabassum ki dhanak khulti rahe

sada aabaad rahe tere chaman ki KHushbu