ganga

ai bahār-e-gang ai bhārat-navāz

terī hastī par hai ik aalam ko naaz

tere ā.īne meñ hai aks-e-falak

qatre qatre meñ masarrat kī jhalak

tere siine meñ haiñ gauhar-hā-e-rāz

raag paanī kā hai kitnā dil-e-gudāz

raag ke parde meñ hai shān-e-hijāb

terī maujoñ se jhalaktā hai shabāb

tairte haiñ phuul yuuñ sāhil ke paas

taaza dāġh-e-dil hoñ goyā dil ke paas

tujh pe sūraj kī shuā.eñ haiñ nisār

husn-o-ḳhūbī kā muraqqā hai bahār

koh-o-sahrā shaad haiñ sairāb haiñ

lahlahātī khetiyāñ shādāb haiñ

tū ravāñ rātoñ ke sannāTe meñ hai

tāzgī kaisī tire naġhme meñ hai

nāznīñ karte haiñ terī aarzū

hai parī-zādoñ kā jamghaT aur tū

ḳhush-ḳharāmoñ kī hai kab ye chāl-Dhāl

terī peshānī se zāhir hai jalāl

ai fazā-e-gang a nāzuk-adā

ġhairat-e-firdaus hai terī fazā

tū hai ahl-e-hind ke dam kī sharīk

tū ḳhushī meñ saath hai ġham kī sharīk

ai bahaar-e-gang ai bhaarat-nawaz

teri hasti par hai ek aalam ko naz

tere aaine mein hai aks-e-falak

qatre qatre mein masarrat ki jhalak

tere sine mein hain gauhar-ha-e-raaz

rag pani ka hai kitna dil-e-gudaz

rag ke parde mein hai shan-e-hijab

teri maujon se jhalakta hai shabab

tairte hain phul yun sahil ke pas

taza dagh-e-dil hon goya dil ke pas

tujh pe suraj ki shuaen hain nisar

husn-o-KHubi ka muraqqa hai bahaar

koh-o-sahra shad hain sairab hain

lahlahati khetiyan shadab hain

tu rawan raaton ke sannaTe mein hai

tazgi kaisi tere naghme mein hai

naznin karte hain teri aarzu

hai pari-zadon ka jamghaT aur tu

KHush-KHaramon ki hai kab ye chaal-Dhaal

teri peshani se zahir hai jalal

ai faza-e-gang a nazuk-ada

ghairat-e-firdaus hai teri faza

tu hai ahl-e-hind ke dam ki sharik

tu KHushi mein sath hai gham ki sharik