ganga

ai shāndār gangā

ai pur-bahār gangā

gangotarī se niklī kaisī uchhal uchhal kar

aur parbatoñ se utrī pahlū badal badal kar

patthar bahā.e tū ne jo rāste meñ aa.e

kuudī bulandiyoñ se jalve ajab dikhā.e

ik raah meñ banā.e sau ābshār gangā

ai shāndār gangā

ai pur-bahār gangā

vo apnī rau meñ bahnā ūñche suroñ meñ gaanā

chiḌiyoñ kā mast rahnā sun kar tirā tarānā

aur vo jo sun ke naġhme dete the daad tujh ko

lete the godiyoñ meñ jo shād-shād tujh ko

karte haiñ yaad tujh ko vo kohsār gangā

ai shāndār gangā

ai pur-bahār gangā

jangal pahāḌ chhoḌe maidāñ basā.e tū ne

ab aur hī tarah ke naqshe jamā.e tū ne

gangā bahā.ī aisī khetoñ ko bhar diyā hai

paudoñ ko jaan dī hai phūloñ ko zar diyā hai

sairāb kar diyā hai har lāla-zār gangā

ai shāndār gangā

ai pur-bahār gangā

haiñ shahr pyāre pyāre aksar tire kināre

tīrath tire kināre mandir tire kināre

jal hai tirā pavittar miTTī bhī terī pyārī

pākīzgī kī devī pākīza hai tū saarī

tujh ko tire pujārī karte haiñ pyaar gangā

ai shāndār gangā

ai pur-bahār gangā

mash.hūr ho ga.ī tū hindostāñ kī maatā

tujh meñ har ek hindū ashnān ko hai aatā

hindostānīyoñ kī hamdam hai tū purānī

duniyā meñ koī dariyā terā nahīñ hai saanī

hai terā saaf paanī amrit kī dhaar gangā

ai shāndār gangā

ai pur-bahār gangā

rātoñ ko chāñd taare lahroñ meñ jhūmte haiñ

phūloñ bhare kināre pairoñ ko chūmte haiñ

sūraj bikhertā hai kirnoñ ke haar tujh par

aur kartī haiñ havā.eñ naqsh-o-nigār tujh par

sab haiñ nisār tujh par sab haiñ nisār gangā

ai shāndār gangā

ai pur-bahār gangā

ai shandar ganga

ai pur-bahaar ganga

gangotari se nikli kaisi uchhal uchhal kar

aur parbaton se utri pahlu badal badal kar

patthar bahae tu ne jo raste mein aae

kudi bulandiyon se jalwe ajab dikhae

ek rah mein banae sau aabshaar ganga

ai shandar ganga

ai pur-bahaar ganga

wo apni rau mein bahna unche suron mein gana

chiDiyon ka mast rahna sun kar tera tarana

aur wo jo sun ke naghme dete the dad tujh ko

lete the godiyon mein jo shad-shad tujh ko

karte hain yaad tujh ko wo kohsar ganga

ai shandar ganga

ai pur-bahaar ganga

jangal pahaD chhoDe maidan basae tu ne

ab aur hi tarah ke naqshe jamae tu ne

ganga bahai aisi kheton ko bhar diya hai

paudon ko jaan di hai phulon ko zar diya hai

sairab kar diya hai har lala-zar ganga

ai shandar ganga

ai pur-bahaar ganga

hain shahr pyare pyare aksar tere kinare

tirath tere kinare mandir tere kinare

jal hai tera pawittar miTTi bhi teri pyari

pakizgi ki dewi pakiza hai tu sari

tujh ko tere pujari karte hain pyar ganga

ai shandar ganga

ai pur-bahaar ganga

mashhur ho gai tu hindostan ki mata

tujh mein har ek hindu ashnan ko hai aata

hindostaniyon ki hamdam hai tu purani

duniya mein koi dariya tera nahin hai sani

hai tera saf pani amrit ki dhaar ganga

ai shandar ganga

ai pur-bahaar ganga

raaton ko chand tare lahron mein jhumte hain

phulon bhare kinare pairon ko chumte hain

suraj bikherta hai kirnon ke haar tujh par

aur karti hain hawaen naqsh-o-nigar tujh par

sab hain nisar tujh par sab hain nisar ganga

ai shandar ganga

ai pur-bahaar ganga