ganga ke kinare

tā-hadd-e-nazar jab nazroñ meñ jannat ke nazāre hote the

bātoñ meñ kinā.e hote the nazroñ meñ ishāre hote the

aise meñ jo aañsū girte the girte hī sitāre hote the

jab chāñdnī rātoñ meñ ham tum gañgā ke kināre hote the

vo raat kā sundar sannāTā chup sādhe hue jaise manzil

gañgā kī dhaḌaktī chhātī par armāñ ke diye jhilmil jhilmil

paanī meñ laraztī rahtī thī chāñd aur sitāroñ kī mahfil

jab chāñdnī rātoñ meñ ham tum gañgā ke kināre hote the

har mauj-e-ravāñ par lahrātī hañstī sī rupahlī ik dhārī

jaise kisī chanchal ke tan par lahrā.e banaras kī saarī

gañgā kī adā pyārī pyārī kuchh aur bhī hotī thī pyārī

jab chāñdnī rātoñ meñ ham tum gañgā ke kināre hote the

ashnān nigāheñ kartī thiiñ parkāsh kī chaḌhtī naddī meñ

ākāsh ke ubhre taare the Duube hue kaif-o-mastī meñ

baiThe nazar aate the ham tum chandā kī rupahlī kashtī meñ

jab chāñdnī rātoñ meñ ham tum gañgā ke kināre hote the

mahtāb kī kirneñ jhuk jhuk kar kuchh jaal rupahlī buntī thiiñ

gañgā kī qasam maujeñ aa kar qadmoñ pe sar apnā dhuntī thiiñ

sab prem kathā.eñ kahtī thiiñ sab prem kathā.eñ suntī thiiñ

jab chāñdnī rātoñ meñ ham tum gañgā ke kināre hote the

yuuñ raag sā chheḌe rahtā thā bahtā huā paanī kā dhārā

jaise koī jogī raat ga.e gaatā ho bajā kar ik taarā

is jhūmtī gaatī gañgā kā hotā thā samāñ pyārā pyārā

jab chāñdnī rātoñ meñ ham tum gañgā ke kināre hote the

armānoñ kī kaliyāñ khiltī thiiñ āshāoñ ke dīpak jalte the

badmast havāoñ ke jhoñke chalte hue pañkhā jhalte the

raat aur hasīñ ho jaatī thī is husn se ham tum chalte the

jab chāñdnī rātoñ meñ ham tum gañgā ke kināre hote the

gañgā ke kināre aate the āzād tabī.at hotī thī

bebāk se ham tum rahte the bebāk mohabbat hotī thī

har shai pe hukūmat karte the har shai pe hukūmat hotī thī

jab chāñdnī rātoñ meñ ham tum gañgā ke kināre hote the

jaise ki 'nazīr' un rātoñ par qudrat bhī karam farmātī thī

bedār ḳhudā kar detā thā āñkhoñ meñ agar niiñd aatī thī

mandir meñ gajar baj jaatā thā masjid meñ azaañ ho jaatī thī

jab chāñdnī rātoñ meñ ham tum gañgā ke kināre hote the

ta-hadd-e-nazar jab nazron mein jannat ke nazare hote the

baaton mein kinae hote the nazron mein ishaare hote the

aise mein jo aansu girte the girte hi sitare hote the

jab chandni raaton mein hum tum ganga ke kinare hote the

wo raat ka sundar sannaTa chup sadhe hue jaise manzil

ganga ki dhaDakti chhati par arman ke diye jhilmil jhilmil

pani mein larazti rahti thi chand aur sitaron ki mahfil

jab chandni raaton mein hum tum ganga ke kinare hote the

har mauj-e-rawan par lahraati hansti si rupahli ek dhaari

jaise kisi chanchal ke tan par lahrae banaras ki sari

ganga ki ada pyari pyari kuchh aur bhi hoti thi pyari

jab chandni raaton mein hum tum ganga ke kinare hote the

ashnan nigahen karti thin parkash ki chaDhti naddi mein

aakash ke ubhre tare the Dube hue kaif-o-masti mein

baiThe nazar aate the hum tum chanda ki rupahli kashti mein

jab chandni raaton mein hum tum ganga ke kinare hote the

mahtab ki kirnen jhuk jhuk kar kuchh jal rupahli bunti thin

ganga ki qasam maujen aa kar qadmon pe sar apna dhunti thin

sab prem kathaen kahti thin sab prem kathaen sunti thin

jab chandni raaton mein hum tum ganga ke kinare hote the

yun rag sa chheDe rahta tha bahta hua pani ka dhaara

jaise koi jogi raat gae gata ho baja kar ek tara

is jhumti gati ganga ka hota tha saman pyara pyara

jab chandni raaton mein hum tum ganga ke kinare hote the

armanon ki kaliyan khilti thin aashaon ke dipak jalte the

badmast hawaon ke jhonke chalte hue pankha jhalte the

raat aur hasin ho jati thi is husn se hum tum chalte the

jab chandni raaton mein hum tum ganga ke kinare hote the

ganga ke kinare aate the aazad tabiat hoti thi

bebak se hum tum rahte the bebak mohabbat hoti thi

har shai pe hukumat karte the har shai pe hukumat hoti thi

jab chandni raaton mein hum tum ganga ke kinare hote the

jaise ki 'nazir' un raaton par qudrat bhi karam farmati thi

bedar KHuda kar deta tha aankhon mein agar nind aati thi

mandir mein gajar baj jata tha masjid mein azan ho jati thi

jab chandni raaton mein hum tum ganga ke kinare hote the