gharib kisan

ai nature ke raaj dulāre

ai fitrat kī aañkh ke taare

mehnat kā phal paane vaale

kāñdhe par hal le jaane vaale

sadiyāñ palTeñ duniyā badle

yā mulkoñ kā naqsha badle

kuchh se kuchh hoñ rañg fazā ke

charḳh se barseñ aag ke sho.ale

dhīmī ho yā tund havā ho

aalam har vaadī kā nayā ho

charḳh hazāroñ palTe khaa.e

kyā mumkin jo tujh ko satā.e

saare jahāñ meñ jañg chhiḌī ho

duniyā bhar meñ aag lagī ho

kyoñ ho shorish terī sadā meñ

amn ho jab khetoñ kī fazā meñ

giit hī terā naġhma-e-shādī

tujh par sadqe har āzādī

sab par haavī himmat terī

sachchī hai ye shaukat terī

vaqt ko tū ġhaflat meñ na kho.e

khet meñ tū kāñToñ ko na bo.e

ghaas hai terā bistar-e-maḳhmal

oḌhne ko bosīda kamal

jañgal jhāḌī bastī terī

shaah se behtar hastī terī

tū hai aur zamāna terā

ham haiñ aur fasāna terā

ai nature ke raj dulare

ai fitrat ki aankh ke tare

mehnat ka phal pane wale

kandhe par hal le jaane wale

sadiyan palTen duniya badle

ya mulkon ka naqsha badle

kuchh se kuchh hon rang faza ke

charKH se barsen aag ke shoale

dhimi ho ya tund hawa ho

aalam har wadi ka naya ho

charKH hazaron palTe khae

kya mumkin jo tujh ko satae

sare jahan mein jang chhiDi ho

duniya bhar mein aag lagi ho

kyon ho shorish teri sada mein

amn ho jab kheton ki faza mein

git hi tera naghma-e-shadi

tujh par sadqe har aazadi

sab par hawi himmat teri

sachchi hai ye shaukat teri

waqt ko tu ghaflat mein na khoe

khet mein tu kanTon ko na boe

ghas hai tera bistar-e-maKHmal

oDhne ko bosida kamal

jangal jhaDi basti teri

shah se behtar hasti teri

tu hai aur zamana tera

hum hain aur fasana tera