girls college ki lari

fazāoñ meñ hai sub.h kā rañg taarī

ga.ī hai abhī girls college kī laarī

ga.ī hai abhī gūñjtī gungunātī

zamāne kī raftār kā raag gaatī

lachaktī huī sī chhalaktī huī sī

bahaktī huī sī mahaktī huī sī

vo saḌkoñ pe phūloñ kī dhārī sī bantī

idhar se udhar se hasīnoñ ko chuntī

jhalakte vo shīshoñ meñ shādāb chehre

vo kaliyāñ sī khultī huī muñh andhere

vo māthe pe saaḌī ke rañgīñ kināre

sahar se nikaltī shafaq ke ishāre

kisī kī adā se ayaañ ḳhush-mazāqī

kisī kī nigāhoñ meñ kuchh niind baaqī

kisī kī nazar meñ mohabbat ke dohe

sakhī rī ye jīvan piyā bin na sohe

ye khiḌkī kā rañgīn shīsha girā.e

vo shīshe se rañgīn chehrā milā.e

ye chaltī zamīñ pe nigāheñ jamātī

vo hoñToñ meñ apne qalam ko dabātī

ye khiḌkī se ik haath bāhar nikāle

vo zaanū pe girtī kitābeñ sambhāle

kisī ko vo har baar tevarī sī chaḌhtī

dukānoñ ke taḳhte adhūre se paḌhtī

koī ik taraf ko simaTtī huī sī

kināre ko saaḌī ke baTtī huī sī

vo laarī meñ gūñje hue zamzame se

dabī muskurāhaT subuk qahqahe se

vo lahjoñ meñ chāñdī khanaktī huī sī

vo nazroñ se kaliyāñ chaTaktī huī sī

saroñ se vo āñchal Dhalakte hue se

vo shānoñ se sāġhar chhalakte hue se

javānī nigāhoñ meñ bahkī huī sī

mohabbat taḳhayyul meñ bahkī huī sī

vo aapas kī chheḌeñ vo jhūTe fasāne

koī un kī bātoñ ko kaise na maane

fasāna bhī un kā tarāna bhī un kā

javānī bhī un kī zamāna bhī un kā

fazaon mein hai subh ka rang tari

gai hai abhi girls college ki lari

gai hai abhi gunjti gungunati

zamane ki raftar ka rag gati

lachakti hui si chhalakti hui si

bahakti hui si mahakti hui si

wo saDkon pe phulon ki dhaari si banti

idhar se udhar se hasinon ko chunti

jhalakte wo shishon mein shadab chehre

wo kaliyan si khulti hui munh andhere

wo mathe pe saDi ke rangin kinare

sahar se nikalti shafaq ke ishaare

kisi ki ada se ayan KHush-mazaqi

kisi ki nigahon mein kuchh nind baqi

kisi ki nazar mein mohabbat ke dohe

sakhi ri ye jiwan piya bin na sohe

ye khiDki ka rangin shisha girae

wo shishe se rangin chehra milae

ye chalti zamin pe nigahen jamati

wo honTon mein apne qalam ko dabaati

ye khiDki se ek hath bahar nikale

wo zanu pe girti kitaben sambhaale

kisi ko wo har bar tewari si chaDhti

dukanon ke taKHte adhure se paDhti

koi ek taraf ko simaTti hui si

kinare ko saDi ke baTti hui si

wo lari mein gunje hue zamzame se

dabi muskurahaT subuk qahqahe se

wo lahjon mein chandi khanakti hui si

wo nazron se kaliyan chaTakti hui si

saron se wo aanchal Dhalakte hue se

wo shanon se saghar chhalakte hue se

jawani nigahon mein bahki hui si

mohabbat taKHayyul mein bahki hui si

wo aapas ki chheDen wo jhuTe fasane

koi un ki baaton ko kaise na mane

fasana bhi un ka tarana bhi un ka

jawani bhi un ki zamana bhi un ka