girya-e-mast

ahbāb se chhup chhup ke bhī royā huuñ maiñ aksar

par aaj bharī bazm meñ

rone kā maza aur hī kuchh hai

ahbāb ko hairat ki mire qahqaha-bardār laboñ par

kyuuñ le ga.iiñ sabqat mirī bhīgī huī palkeñ

mire tapte hue aañsū

shāyad mire ahbāb ko ma.alūm nahīñ hai

iz.hār masarrat kabhī hotā hai jo ro kar

sau baar kā hañsnā bhī use chhū nahīñ saktā

aañsū haiñ vo motī

palkoñ ke sadaf se jo nikalte haiñ usī dam

jab dil ke samundar meñ

ḳhushī kā koī tūfān bapā ho

tūfān samā saktā nahīñ sirf hañsī meñ

aañsū hī use apnī tarāvaT meñ sameTeñ to sameTeñ

aañsū ki jasāmat meñ haiñ qatre se bhī kuchh kam

iz.hār masarrat meñ samundar se baḌe haiñ

behis mire ahbāb haiñ

kaash un ko batā.e koī hamdam

hāsil jo ḳhushī aaj huī hai mire dil ko

shāyad vo tabassum meñ sameTī hī na jaatī

hoñToñ pe tabassum bhī bahut ḳhuub hai lekin

āñkhoñ meñ tarashshoh kī fazā aur hī kuchh hai

us bazm meñ rone kā maza aur hī kuchh hai

ahbab se chhup chhup ke bhi roya hun main aksar

par aaj bhari bazm mein

rone ka maza aur hi kuchh hai

ahbab ko hairat ki mere qahqaha-bardar labon par

kyun le gain sabqat meri bhigi hui palken

mere tapte hue aansu

shayad mere ahbab ko malum nahin hai

izhaar masarrat kabhi hota hai jo ro kar

sau bar ka hansna bhi use chhu nahin sakta

aansu hain wo moti

palkon ke sadaf se jo nikalte hain usi dam

jab dil ke samundar mein

KHushi ka koi tufan bapa ho

tufan sama sakta nahin sirf hansi mein

aansu hi use apni tarawaT mein sameTen to sameTen

aansu ki jasamat mein hain qatre se bhi kuchh kam

izhaar masarrat mein samundar se baDe hain

behis mere ahbab hain

kash un ko batae koi hamdam

hasil jo KHushi aaj hui hai mere dil ko

shayad wo tabassum mein sameTi hi na jati

honTon pe tabassum bhi bahut KHub hai lekin

aankhon mein tarashshoh ki faza aur hi kuchh hai

us bazm mein rone ka maza aur hi kuchh hai