gladiola

mirī kī alhaḌ pahāḌiyoñ ke chabūtaroñ par

harī harī narm lāmbī lāmbī ghaas se sar-kashīda shāḳheñ

hatheliyoñ par sajā.e sīndhūrī gul-adā se

fazā-e-ḳhush-rañg meñ lahak kar

har ek rahrav ke dāman-e-dil ko khīñchtī haiñ

sabā kī sargoshiyāñ musallam

ye kaise gul haiñ ki in kī ḳhushbū se chauñktā bhī nahīñ hai koī

magar unheñ dekh kar ka.ī tez-gām rahrav

sambhal ke chalne meñ āfiyat kā sahārā le kar

ḳhayāl kī vādiyoñ meñ aise utarne lagte haiñ jaise koī utārtā ho parī ko shīshe meñ ḳhāmushī se

kisī ke rañgoñ kī aañch hai aur kisī ke vijdān kā tahayyur

ye iztirār-e-nigāh bhī hai ye iztirāb-e-qulūb hai

ye bostān-e-jamāl ke ḳhush-ḳhirām rahrav

hujūm-e-rañg-e-ḳhayāl meñ raah se bhaTak kar

abad kī manzil ko dam-ba-dam DhūñDte raheñge

ye ek saa.at kā rañg jis meñ surūr bhī hai vuqūf bhī hai

yahī farāz-e-abad ke rastoñ kā rāzdāñ hai

ye rañg āñkhoñ ko ḳhīra kar de to kaun dekhe

varā-e-had-e-nigāh kyā hai

meri ki alhaD pahaDiyon ke chabutaron par

hari hari narm lambi lambi ghas se sar-kashida shaKHen

hatheliyon par sajae sindhuri gul-ada se

faza-e-KHush-rang mein lahak kar

har ek rahraw ke daman-e-dil ko khinchti hain

saba ki sargoshiyan musallam

ye kaise gul hain ki in ki KHushbu se chaunkta bhi nahin hai koi

magar unhen dekh kar kai tez-gam rahraw

sambhal ke chalne mein aafiyat ka sahaara le kar

KHayal ki wadiyon mein aise utarne lagte hain jaise koi utarta ho pari ko shishe mein KHamushi se

kisi ke rangon ki aanch hai aur kisi ke wijdan ka tahayyur

ye iztirar-e-nigah bhi hai ye iztirab-e-qulub hai

ye bostan-e-jamal ke KHush-KHiram rahraw

hujum-e-rang-e-KHayal mein rah se bhaTak kar

abad ki manzil ko dam-ba-dam DhunDte rahenge

ye ek saat ka rang jis mein surur bhi hai wuquf bhi hai

yahi faraaz-e-abad ke raston ka raazdan hai

ye rang aankhon ko KHira kar de to kaun dekhe

wara-e-had-e-nigah kya hai