goDo

havā.eñ chaltī haiñ thamtī haiñ bahne lagtī haiñ

na.e libās na.e rañg-rūp saj-dhaj se

purāne zaḳhm na.e din ko yaad karte haiñ

vo din jo aa ke naqābeñ utaar Dālegā

nazar ko dil se milā.egā dil ko bātoñ se

har ek lafz meñ ma.anī kī raushnī hogī

magar ye ḳhvāb kī bāteñ sarāb kī yādeñ

har ek baar pashemān dil girafta haiñ

sub.h ke saare hī aḳhbār vahshat-afzā haiñ

har ek rahzan o rahbar kī aaj ban aa.ī

ki ab har ek jiyālā hai sūrmā sab haiñ

batā.ūñ kis se ki maiñ muntazir huuñ jis din kā

vo shāyad ab na kabhī aa.egā zamāne meñ

kahāñ pe hai mirā goDo mujhe ḳhabar hī nahīñ

use maiñ DhūñD chukā rome aur london meñ

na moscow meñ milā aur na chiin o paris meñ

bhalā milegā kahāñ bamba.ī kī galiyoñ meñ

ye intizār-e-musalsal ye jāñ-kanī ye azaab

har ek lamha jahannam har ek ḳhvāb sarāb

hawaen chalti hain thamti hain bahne lagti hain

nae libas nae rang-rup saj-dhaj se

purane zaKHm nae din ko yaad karte hain

wo din jo aa ke naqaben utar Dalega

nazar ko dil se milaega dil ko baaton se

har ek lafz mein mani ki raushni hogi

magar ye KHwab ki baaten sarab ki yaaden

har ek bar pasheman dil girafta hain

subh ke sare hi aKHbar wahshat-afza hain

har ek rahzan o rahbar ki aaj ban aai

ki ab har ek jiyala hai surma sab hain

bataun kis se ki main muntazir hun jis din ka

wo shayad ab na kabhi aaega zamane mein

kahan pe hai mera goDo mujhe KHabar hi nahin

use main DhunD chuka rome aur london mein

na moscow mein mila aur na chin o paris mein

bhala milega kahan bambai ki galiyon mein

ye intizar-e-musalsal ye jaan-kani ye azab

har ek lamha jahannam har ek KHwab sarab