goristan-e-shahi

āsmāñ bādal kā pahne ḳhirqa-e-derīna hai

kuchh mukaddar sā jabīn-e-māh kā ā.īna hai

chāñdnī phīkī hai is nazzāra-e-ḳhāmosh meñ

sub.h-e-sādiq so rahī hai raat kī āġhosh meñ

kis qadar ashjār kī hairat-fazā hai ḳhāmushī

barbat-e-qudrat kī dhīmī sī navā hai ḳhāmushī

bātin-e-har-zarra-e-ālim sarāpā dard hai

aur ḳhāmoshī lab-e-hastī pe āh-e-sard hai

aah jaulāñ-gāh-e-ālam-gīr yaanī vo hisār

dosh par apne uThā.e saikḌoñ sadiyoñ kā baar

zindagī se thā kabhī ma.amūr ab sunsān hai

ye ḳhamoshī us ke hañgāmoñ kā goristān hai

apne sukkān-e-kuhan kī ḳhaak kā dil-dāda hai

koh ke sar par misāl-e-pāsbāñ istāda hai

abr ke rauzan se vo bālā-e-bām-e-āsmāñ

nāzir-e-ālam hai najm-e-sabz-fām-e-āsmāñ

ḳhāk-bāzī vus.at-e-duniyā kā hai manzar use

dāstāñ nākāmi-e-insāñ kī hai azbar use

hai azal se ye musāfir sū-e-manzil jā rahā

āsmāñ se inqilāboñ kā tamāshā dekhtā

go sukūñ mumkin nahīñ aalam meñ aḳhtar ke liye

fātiha-ḳhvānī ko ye Thahrā hai dam bhar ke liye

rañg-o-āb-e-zinagī se gul-ba-dāman hai zamīñ

saikḌoñ ḳhūñ-gashta tahzīboñ kā madfan hai zamīñ

ḳhvāb-gah shāhoñ kī hai ye manzil-e-hasrat-fazā

dīda-e-ibrat ḳhirāj-e-ashk-e-gul-gūñ kar adā

hai to goristāñ magar ye ḳhāk-e-gardūñ-pāya hai

aah ik bargashta qismat qaum kā sarmāya hai

maqbaroñ kī shaan hairat-āfrīñ hai is qadar

jumbish-e-mizhgāñ se hai chashm-e-tamāshā ko hazar

kaifiyat aisī hai nākāmī kī is tasvīr meñ

jo utar saktī nahīñ ā.īna-e-tahrīr meñ

sote haiñ ḳhāmosh ābādī ke hañgāmoñ se duur

muztarib rakhtī thī jin ko ārzū-e-nā-subūr

qabr kī zulmat meñ hai in āftāboñ kī chamak

jin ke darvāzoñ pe rahtā hai jabīñ-gustār falak

kyā yahī hai in shahanshāhoñ kī azmat kā ma.aal

jin kī tadbīr-e-jahāñbānī se Dartā thā zavāl

rob-e-faġhfūrī ho duniyā meñ ki shān-e-qaisarī

Tal nahīñ saktī ġhanīm-e-maut kī yūrish kabhī

bādshāhoñ kī bhī kisht-e-umr kā hāsil hai gor

jāda-e-azmat kī goyā āḳhirī manzil hai gor

shorish-e-bazm-e-tarab kyā uud kī taqrīr kyā

dardmandān-e-jahāñ kā nāla-e-shab-gīr kyā

arsa-e-paikār meñ hañgāma-e-shamshīr kyā

ḳhuun ko garmāne vaalā nāra-e-takbīr kyā

ab koī āvāz sotoñ ko jagā saktī nahīñ

sīna-e-vīrāñ meñ jān-e-rafta aa saktī nahīñ

rūh-e-musht-e-ḳhāk meñ zahmat-kash-e-bedād hai

kūcha gard-e-nai huā jis dam nafas fariyād hai

zindagī insāñ kī hai mānind-e-murġh-e-ḳhush-navā

shāḳh par baiThā koī dam chahchahāyā uḌ gayā

aah kyā aa.e riyāz-e-dahr meñ ham kyā ga.e

zindagī kī shāḳh se phūTe khile murjhā ga.e

maut har shaah o gadā ke ḳhvāb kī tābīr hai

is sitamgar kā sitam insāf kī tasvīr hai

silsila hastī kā hai ik bahr-e-nā-paidā-kanār

aur is dariyā-e-be-pāyāñ kī maujeñ haiñ mazār

ai havas ḳhuuñ ro ki hai ye zindagī be-e'tibār

ye sharāre kā tabassum ye ḳhas-e-ātish-savār

chāñd jo sūrat-gar-e-hastī kā ik ejaaz hai

pahne sīmābī qabā mahv-e-ḳhirām-e-nāz hai

charḳh-e-be-anjum kī dahshatnāk vus.at meñ magar

bekasī is kī koī dekhe zarā vaqt-e-sahar

ik zarā sā abr kā TukḌā hai jo mahtāb thā

āḳhirī aañsū Tapak jaane meñ ho jis kī fanā

zindagī aqvām kī bhī hai yūñhī be-e'tibār

rañg-hā-e-rafta kī tasvīr hai un kī bahār

is ziyāñ-ḳhāne meñ koī millat-e-gardūñ-vaqār

rah nahīñ saktī abad tak bār-e-dosh-e-rozgār

is qadar qaumoñ kī barbādī se hai ḳhūgar jahāñ

dekhtā be-e'tinā.ī se hai ye manzar jahāñ

ek sūrat par nahīñ rahtā kisī shai ko qarār

zauq-e-jiddat se hai tarkīb-e-mizāj-e-rozgār

hai nagīn-e-dahr kī zīnat hamesha nām-e-nau

mādar-e-gītī rahī ābastan-e-aqvām-e-nau

hai hazāroñ qāfiloñ se āshnā ye rahguzar

chashm-e-koh-e-nūr ne dekhe haiñ kitne tājvar

misr o bābul miT ga.e baaqī nishāñ tak bhī nahīñ

daftar-e-hastī meñ un kī dāstāñ tak bhī nahīñ

aa dabāyā mehr-e-īrāñ ko ajal kī shaam ne

azmat-e-yūnān-o-rūmā luuT lī ayyām ne

aah muslim bhī zamāne se yūñhī ruḳhsat huā

āsmāñ se abr-e-āzārī uThā barsā gayā

hai rag-e-gul sub.h ke ashkoñ se motī kī laḌī

koī sūraj kī kiran shabnam meñ hai uljhī huī

sīna-e-dariyā shuāoñ ke liye gahvāra hai

kis qadar pyārā lab-e-jū mehr kā nazzāra hai

mahv-e-zīnat hai sanobar jūebār-e-ā.īna hai

ġhuncha-e-gul ke liye bād-e-bahār-e-ā.īna hai

na.ara-zan rahtī hai koyal baaġh ke kāshāne meñ

chashm-e-insāñ se nihāñ pattoñ ke uzlat-ḳhāne meñ

aur bulbul mutrib-e-rañgīñ navā-e-gulsitāñ

jis ke dam se zinda hai goyā havā-e-gulsitāñ

ishq ke hañgāmoñ kī uḌtī huī tasvīr hai

ḳhāma-e-qudrat kī kaisī shoḳh ye tahrīr hai

baaġh meñ ḳhāmosh jalse gulsitāñ-zādoñ ke haiñ

vādi-e-kohsār meñ na.are shabāñ-zādoñ ke haiñ

zindagī se ye purānā ḳhāk-dāñ ma.amūr hai

maut meñ bhī zindagānī kī taḌap mastūr hai

pattiyāñ phūloñ kī girtī haiñ ḳhizāñ meñ is tarah

dast-e-tifl-e-ḳhufta se rañgīñ khilaune jis tarah

is nashāt-ābād meñ go aish be-andāza hai

ek ġham yaanī ġham-e-millat hamesha taaza hai

dil hamāre yād-e-ahd-e-rafta se ḳhālī nahīñ

apne shāhoñ ko ye ummat bhūlne vaalī nahīñ

ashk-bārī ke bahāne haiñ ye ujḌe baam o dar

girya-e-paiham se biinā hai hamārī chashm-e-tar

dahr ko dete haiñ motī dīda-e-giryāñ ke ham

āḳhirī bādal haiñ ik guzre hue tūfāñ ke ham

haiñ abhī sad-hā guhar is abr kī āġhosh meñ

barq abhī baaqī hai is ke sīna-e-ḳhāmosh meñ

vādi-e-gul ḳhāk-e-sahrā ko banā saktā hai ye

ḳhvāb se ummīd-e-dahqāñ ko jagā saktā hai ye

ho chukā go qaum kī shān-e-jalālī kā zuhūr

hai magar baaqī abhī shān-e-jamālī kā zuhūr

aasman baadal ka pahne KHirqa-e-derina hai

kuchh mukaddar sa jabin-e-mah ka aaina hai

chandni phiki hai is nazzara-e-KHamosh mein

subh-e-sadiq so rahi hai raat ki aaghosh mein

kis qadar ashjar ki hairat-faza hai KHamushi

barbat-e-qudrat ki dhimi si nawa hai KHamushi

baatin-e-har-zarra-e-alim sarapa dard hai

aur KHamoshi lab-e-hasti pe aah-e-sard hai

aah jaulan-gah-e-alam-gir yani wo hisar

dosh par apne uThae saikDon sadiyon ka bar

zindagi se tha kabhi mamur ab sunsan hai

ye KHamoshi us ke hangamon ka goristan hai

apne sukkan-e-kuhan ki KHak ka dil-dada hai

koh ke sar par misal-e-pasban istada hai

abr ke rauzan se wo baala-e-baam-e-asman

nazir-e-alam hai najm-e-sabz-fam-e-asman

KHak-bazi wusat-e-duniya ka hai manzar use

dastan nakaami-e-insan ki hai azbar use

hai azal se ye musafir su-e-manzil ja raha

aasman se inqilabon ka tamasha dekhta

go sukun mumkin nahin aalam mein aKHtar ke liye

fatiha-KHwani ko ye Thahra hai dam bhar ke liye

rang-o-ab-e-zinagi se gul-ba-daman hai zamin

saikDon KHun-gashta tahzibon ka madfan hai zamin

KHwab-gah shahon ki hai ye manzil-e-hasrat-faza

dida-e-ibrat KHiraj-e-ashk-e-gul-gun kar ada

hai to goristan magar ye KHak-e-gardun-paya hai

aah ek bargashta qismat qaum ka sarmaya hai

maqbaron ki shan hairat-afrin hai is qadar

jumbish-e-mizhgan se hai chashm-e-tamasha ko hazar

kaifiyat aisi hai nakaami ki is taswir mein

jo utar sakti nahin aaina-e-tahrir mein

sote hain KHamosh aabaadi ke hangamon se dur

muztarib rakhti thi jin ko aarzu-e-na-subur

qabr ki zulmat mein hai in aaftabon ki chamak

jin ke darwazon pe rahta hai jabin-gustar falak

kya yahi hai in shahanshahon ki azmat ka maal

jin ki tadbir-e-jahanbani se Darta tha zawal

rob-e-faghfuri ho duniya mein ki shan-e-qaisari

Tal nahin sakti ghanim-e-maut ki yurish kabhi

baadshahon ki bhi kisht-e-umr ka hasil hai gor

jada-e-azmat ki goya aaKHiri manzil hai gor

shorish-e-bazm-e-tarab kya ud ki taqrir kya

dardmandan-e-jahan ka nala-e-shab-gir kya

arsa-e-paikar mein hangama-e-shamshir kya

KHun ko garmane wala nara-e-takbir kya

ab koi aawaz soton ko jaga sakti nahin

sina-e-viran mein jaan-e-rafta aa sakti nahin

ruh-e-musht-e-KHak mein zahmat-kash-e-bedad hai

kucha gard-e-nai hua jis dam nafas fariyaad hai

zindagi insan ki hai manind-e-murgh-e-KHush-nawa

shaKH par baiTha koi dam chahchahaya uD gaya

aah kya aae riyaz-e-dahr mein hum kya gae

zindagi ki shaKH se phuTe khile murjha gae

maut har shah o gada ke KHwab ki tabir hai

is sitamgar ka sitam insaf ki taswir hai

silsila hasti ka hai ek bahr-e-na-paida-kanar

aur is dariya-e-be-payan ki maujen hain mazar

ai hawas KHun ro ki hai ye zindagi be-e'tibar

ye sharare ka tabassum ye KHas-e-atish-sawar

chand jo surat-gar-e-hasti ka ek ejaz hai

pahne simabi qaba mahw-e-KHiram-e-naz hai

charKH-e-be-anjum ki dahshatnak wusat mein magar

bekasi is ki koi dekhe zara waqt-e-sahar

ek zara sa abr ka TukDa hai jo mahtab tha

aaKHiri aansu Tapak jaane mein ho jis ki fana

zindagi aqwam ki bhi hai yunhi be-e'tibar

rang-ha-e-rafta ki taswir hai un ki bahaar

is ziyan-KHane mein koi millat-e-gardun-waqar

rah nahin sakti abad tak bar-e-dosh-e-rozgar

is qadar qaumon ki barbaadi se hai KHugar jahan

dekhta be-e'tinai se hai ye manzar jahan

ek surat par nahin rahta kisi shai ko qarar

zauq-e-jiddat se hai tarkib-e-mizaj-e-rozgar

hai nagin-e-dahr ki zinat hamesha nam-e-nau

madar-e-giti rahi aabastan-e-aqwam-e-nau

hai hazaron qafilon se aashna ye rahguzar

chashm-e-koh-e-nur ne dekhe hain kitne tajwar

misr o babul miT gae baqi nishan tak bhi nahin

daftar-e-hasti mein un ki dastan tak bhi nahin

aa dabaya mehr-e-iran ko ajal ki sham ne

azmat-e-yunan-o-ruma luT li ayyam ne

aah muslim bhi zamane se yunhi ruKHsat hua

aasman se abr-e-azari uTha barsa gaya

hai rag-e-gul subh ke ashkon se moti ki laDi

koi suraj ki kiran shabnam mein hai uljhi hui

sina-e-dariya shuaon ke liye gahwara hai

kis qadar pyara lab-e-ju mehr ka nazzara hai

mahw-e-zinat hai sanobar juebar-e-aina hai

ghuncha-e-gul ke liye baad-e-bahaar-e-aina hai

nara-zan rahti hai koyal bagh ke kashane mein

chashm-e-insan se nihan patton ke uzlat-KHane mein

aur bulbul mutrib-e-rangin nawa-e-gulsitan

jis ke dam se zinda hai goya hawa-e-gulsitan

ishq ke hangamon ki uDti hui taswir hai

KHama-e-qudrat ki kaisi shoKH ye tahrir hai

bagh mein KHamosh jalse gulsitan-zadon ke hain

wadi-e-kohsar mein nare shaban-zadon ke hain

zindagi se ye purana KHak-dan mamur hai

maut mein bhi zindagani ki taDap mastur hai

pattiyan phulon ki girti hain KHizan mein is tarah

dast-e-tifl-e-KHufta se rangin khilaune jis tarah

is nashat-abaad mein go aish be-andaza hai

ek gham yani gham-e-millat hamesha taza hai

dil hamare yaad-e-ahd-e-rafta se KHali nahin

apne shahon ko ye ummat bhulne wali nahin

ashk-bari ke bahane hain ye ujDe baam o dar

girya-e-paiham se bina hai hamari chashm-e-tar

dahr ko dete hain moti dida-e-giryan ke hum

aaKHiri baadal hain ek guzre hue tufan ke hum

hain abhi sad-ha guhar is abr ki aaghosh mein

barq abhi baqi hai is ke sina-e-KHamosh mein

wadi-e-gul KHak-e-sahra ko bana sakta hai ye

KHwab se ummid-e-dahqan ko jaga sakta hai ye

ho chuka go qaum ki shan-e-jalali ka zuhur

hai magar baqi abhi shan-e-jamali ka zuhur