guftugu

kal ik buzurgvār se kuchh bahs ho ga.ī

kyā guftugū huī ye zarā sun leñ aap bhī

maiñ ne kahā janāb se mahñgā.ī hai bahut

bole tumhārī āmad-e-bālā.ī hai bahut

maiñ bolā petrol kī qīmat pe kuchh kaho

kahne lage ki mahñgā hai paidal chalā karo

maiñ ne kahā ki pyaaz kā lahsan kā kyā kareñ

kahne lage baghār meñ ziira liyā kareñ

maiñ ne kahā ki garmī meñ bijlī kā kyā kareñ

kahne lage ki haath se pankhā jhalā kareñ

maiñ ne kahā train meñ hai bhiiḌ kis qadar

bole ki kyoñ bhaTakte ho har roz idhar-udhar

maiñ ne kahā ki kursī ke aate haiñ mujh ko ḳhvāb

bole ki roz āyat-e-kursī paḌho janāb

maiñ ne kahā ki paanī kī qillat bhī hai janāb

kahne lage ki paanī ke badle piyo sharāb

maiñ ne kahā ki shā.erī mujh ko sikhā.iye

bole mushā.eron meñ mire sher gā.iye

maiñ ne kahā mushā.era lūTeñgī shā.erāt

bole isī liye to huī shā.iroñ ko maat

maiñ bolā sher maiñ bhī sunātā huuñ lā-javāb

bole ki hai tumhārā tarannum bahut ḳharāb

maiñ ne kahā na kaam hai ne koī kārobār

kahne lage ki sher kaho roz be-shumār

maiñ ne kahā ki dhuup meñ garmī meñ kyā kareñ

bole ki ghar meñ biivī kī sūrat takā kareñ

kal ek buzurgwar se kuchh bahs ho gai

kya guftugu hui ye zara sun len aap bhi

main ne kaha janab se mahngai hai bahut

bole tumhaari aamad-e-baalai hai bahut

main bola petrol ki qimat pe kuchh kaho

kahne lage ki mahnga hai paidal chala karo

main ne kaha ki pyaz ka lahsan ka kya karen

kahne lage baghaar mein zira liya karen

main ne kaha ki garmi mein bijli ka kya karen

kahne lage ki hath se pankha jhala karen

main ne kaha train mein hai bhiD kis qadar

bole ki kyon bhaTakte ho har roz idhar-udhar

main ne kaha ki kursi ke aate hain mujh ko KHwab

bole ki roz aayat-e-kursi paDho janab

main ne kaha ki pani ki qillat bhi hai janab

kahne lage ki pani ke badle piyo sharab

main ne kaha ki shaeri mujh ko sikhaiye

bole mushaeron mein mere sher gaiye

main ne kaha mushaera luTengi shaeraat

bole isi liye to hui shairon ko mat

main bola sher main bhi sunata hun la-jawab

bole ki hai tumhaara tarannum bahut KHarab

main ne kaha na kaam hai ne koi karobar

kahne lage ki sher kaho roz be-shumar

main ne kaha ki dhup mein garmi mein kya karen

bole ki ghar mein biwi ki surat taka karen