gul

ai gul-e-rañgīñ-qabā ai ġhāza-e-rū-e-bahār

tū hai ḳhud apne jamāl-e-husn kā ā.īna-dār

haa.e vo tere tabassum kī adā vaqt-e-sahar

sub.h ke taare ne apnī jaan tak kar dī nisār

sharm ke maare gulābī hai idhar rū-e-shafaq

shabnam-āgīñ hai idhar peshānī-e-sub.h-e-bahār

yuuñ nigār-e-mahr tere sāmne aayā to kyā

laḌkhaḌātā sar jhukā.e zard rū sīmāb-vār

ḳhāmushī terī adā hai, sādgī fitrat meñ hai

phir bhī jo terā harīf-e-husn hai, hairat meñ hai

ai gul-e-nāzuk-adā, ai ḳhanda-e-sub.h-e-chaman

chūmtī hai tere hoñToñ ko nasīm-e-mushk-e-tan

gher leñ jaise urūs-e-nau ko ham-sin laḌkiyāñ

yuuñ tujhe ghere hue haiñ nau-nihālān-e-chaman

vādiyoñ meñ tuu, bayābānoñ meñ tuu, bastī meñ tū

raunaq-e-har-mahfil o zīnat-dah-e-har-anjuman

ye adā-e-sādgī, mahbūbiyat, ma.asūmiyat

tū rah-e-hastī meñ kis andāz se hai gāmzan

josh-e-sarmastī meñ vo mauj-e-sabā kī chheḌ-chhāḌ

vo tire aariz pe ik halke tabassum kī shikan

tū zamīn-e-rañg-o-bū, tū āsmān-e-rañg-o-bū

muḳhtasar ye hai ki tū hai ik jahān-e-rañg-o-bū

ai gul-e-rangin-qaba ai ghaza-e-ru-e-bahaar

tu hai KHud apne jamal-e-husn ka aaina-dar

hae wo tere tabassum ki ada waqt-e-sahar

subh ke tare ne apni jaan tak kar di nisar

sharm ke mare gulabi hai idhar ru-e-shafaq

shabnam-agin hai idhar peshani-e-subh-e-bahaar

yun nigar-e-mahr tere samne aaya to kya

laDkhaData sar jhukae zard ru simab-war

KHamushi teri ada hai, sadgi fitrat mein hai

phir bhi jo tera harif-e-husn hai, hairat mein hai

ai gul-e-nazuk-ada, ai KHanda-e-subh-e-chaman

chumti hai tere honTon ko nasim-e-mushk-e-tan

gher len jaise urus-e-nau ko ham-sin laDkiyan

yun tujhe ghere hue hain nau-nihaalan-e-chaman

wadiyon mein tu, bayabanon mein tu, basti mein tu

raunaq-e-har-mahfil o zinat-dah-e-har-anjuman

ye ada-e-sadgi, mahbubiyat, masumiyat

tu rah-e-hasti mein kis andaz se hai gamzan

josh-e-sarmasti mein wo mauj-e-saba ki chheD-chhaD

wo tere aariz pe ek halke tabassum ki shikan

tu zamin-e-rang-o-bu, tu aasman-e-rang-o-bu

muKHtasar ye hai ki tu hai ek jahan-e-rang-o-bu