ghulam gardish

ḳhushī

adam ke kisī jharoke

kī oT se jhāñktī nazar kā fareb koī

tavīl be-rahm rāstoñ par sarāb koī

tamām shab jugnuoñ ko chunñe kā ḳhvāb koī

ḳhushī

vo rah rah ke chand lamhoñ ko saañs letā habāb koī

udaas tāroñ ko chheḌtī uñgliyoñ ke zaḳhmoñ

se uThte sar ke ḳhayāl meñ gum rabāb koī

ḳhushī

ki mīzān ke jazīroñ se duur ik be-nishān sāhil

zamāne bhar kī ḳhalīj haa.il

ubhartī maujoñ meñ

ġharq hone kī dāstānoñ kī jhilmilāhaT

jo chhūnā chāho

to dastaras meñ

koī jazīra na koī sāhil

ye ḳhaak aur aab kā tavāzun

ye band muTThī se zarra zarra phisaltī miTTī

nazar meñ collage ik mujarrad

idhar gumāñ kī muñDer par kuchh nishān

anqā ke baiThne kā fareb jaise

tū us kināre tarāzū thāme

mujassame kī safed āñkhoñ pe ma.anaviyyat kī kaalī paTTī

vahī siyāhī

añdhere kā hai jo pesh-ḳhema

vo sang āñkheñ

ki jin meñ putlī kabhī nahīñ thī

vo jin kī tah meñ

kisī kiran kā guzar nahīñ hai

ḳhushī hai kyā munsifī hai kyā

kuchh ḳhabar nahīñ hai

KHushi

adam ke kisi jharoke

ki oT se jhankti nazar ka fareb koi

tawil be-rahm raston par sarab koi

tamam shab jugnuon ko chunne ka KHwab koi

KHushi

wo rah rah ke chand lamhon ko sans leta habab koi

udas taron ko chheDti ungliyon ke zaKHmon

se uThte sar ke KHayal mein gum rabab koi

KHushi

ki mizan ke jaziron se dur ek be-nishan sahil

zamane bhar ki KHalij hail

ubharti maujon mein

gharq hone ki dastanon ki jhilmilahaT

jo chhuna chaho

to dastaras mein

koi jazira na koi sahil

ye KHak aur aab ka tawazun

ye band muTThi se zarra zarra phisalti miTTi

nazar mein collage ek mujarrad

idhar guman ki munDer par kuchh nishan

anqa ke baiThne ka fareb jaise

tu us kinare taraazu thame

mujassame ki safed aankhon pe manawiyyat ki kali paTTi

wahi siyahi

andhere ka hai jo pesh-KHema

wo sang aankhen

ki jin mein putli kabhi nahin thi

wo jin ki tah mein

kisi kiran ka guzar nahin hai

KHushi hai kya munsifi hai kya

kuchh KHabar nahin hai