gulzar

vo ik lamha baḌā muqaddas thā

vo ik lamha ki jis meñ

āsmāñ sab āyatoñ kā vird karte the

sitāre haath meñ le kar

jahannam kī sulagtī aur dahaktī aag ke uupar

farishte apne apne pañkhoñ kī

būñdeñ jhaTakte the

ḳhudā ne ek lamhe ko nigāheñ muuñd kar apnī

tasallut kī girah ko Dhīlā chhoḌā thā

nizām-e-azal toḌā thā

vo ik lamha ki jis meñ

gardishoñ ke paar sayyāroñ ne pahlī baar

holiday manāyā thā

vo ik lamha ki jis meñ tum janm le rahe the

wo ek lamha baDa muqaddas tha

wo ek lamha ki jis mein

aasman sab aayaton ka wird karte the

sitare hath mein le kar

jahannam ki sulagti aur dahakti aag ke upar

farishte apne apne pankhon ki

bunden jhaTakte the

KHuda ne ek lamhe ko nigahen mund kar apni

tasallut ki girah ko Dhila chhoDa tha

nizam-e-azal toDa tha

wo ek lamha ki jis mein

gardishon ke par sayyaron ne pahli bar

holiday manaya tha

wo ek lamha ki jis mein tum janm le rahe the