gum-nam sahil

milo ik din kisī gum-nām sāhil par

vahāñ par ham-qadam ho kar

chaleñge duur tak yuuñ hī

ham apne bhīge pairoñ ke nishāñ ko

ret ke dāman se chun kar

manziloñ ke haath meñ de kar

koī va.ada kareñge

nayā sapnā buneñge

uThā kar koī armāñ

reg sāhil se

ham ik din

sīpiyoñ ke dil meñ rakh deñge

taaki abr-e-naisāñ

jab bhī barse

sīpiyāñ motī janeñ

parinde bhuul kar parvāz apnī

dard kī lahreñ gineñ

milo ik din kisī gumnām sāhil par

samundar ke kushāda-dil meñ sūraj Dūbtā hai jab

samay jis dam gale mil kar sindūrī shaam kartā hai

shafaq ke haath tezī se

ufuq meñ rang bharte haiñ

maujoñ ko kināroñ par sabā mahmez kartī hai

fazā gul-rez kartī hai

kahāñ tak rok sakte haiñ

ḳhvāboñ kī uḌānoñ ko

ye lahreñ dil meñ rakhtī haiñ

bahut sī dāstānoñ ko

milo ik din kisī gum-nām sāhil par

hamāre baḳht-e-ḳhvābīda ko

maujoñ kī koī karvaT jagā degī

mohabbat zindagī ko ḳhushbūoñ kā rāsta degī

ham apnī ok meñ le kar samundar se koī qatra

zamīn-e-dil ko nam kar ke

vahāñ par ḳhvāb bo.eñge

hamārī maḳhmalīñ ḳhvāhish

zarā sī bhiig jā.egī

to jiinā siikh jā.egī

milo ik din kisī gumnām sāhil par

nahīñ badlā ye dil ham ne

ka.ī mausam ḳharāb aa.e

samundar chāhtā ye hai

mohabbat zer-e-āb aa.e

chalo in kashtiyoñ ke bādbānoñ par

tumhārā naam likh kar ham

sunahre pāniyoñ ke haath meñ de deñ

ye kashtī DhūñD legī jab

mohabbat ke jazīre ko

to ham umr-e-ravāñ ik saath kāTeñge

tumhārā dard bāñTeñge

milo ik din kisī gumnām sāhil par

milo ek din kisi gum-nam sahil par

wahan par ham-qadam ho kar

chalenge dur tak yun hi

hum apne bhige pairon ke nishan ko

ret ke daman se chun kar

manzilon ke hath mein de kar

koi wada karenge

naya sapna bunenge

uTha kar koi arman

reg sahil se

hum ek din

sipiyon ke dil mein rakh denge

taki abr-e-naisan

jab bhi barse

sipiyan moti janen

parinde bhul kar parwaz apni

dard ki lahren ginen

milo ek din kisi gumnam sahil par

samundar ke kushada-dil mein suraj Dubta hai jab

samay jis dam gale mil kar sinduri sham karta hai

shafaq ke hath tezi se

ufuq mein rang bharte hain

maujon ko kinaron par saba mahmez karti hai

faza gul-rez karti hai

kahan tak rok sakte hain

KHwabon ki uDanon ko

ye lahren dil mein rakhti hain

bahut si dastanon ko

milo ek din kisi gum-nam sahil par

hamare baKHt-e-KHwabida ko

maujon ki koi karwaT jaga degi

mohabbat zindagi ko KHushbuon ka rasta degi

hum apni ok mein le kar samundar se koi qatra

zamin-e-dil ko nam kar ke

wahan par KHwab boenge

hamari maKHmalin KHwahish

zara si bhig jaegi

to jina sikh jaegi

milo ek din kisi gumnam sahil par

nahin badla ye dil hum ne

kai mausam KHarab aae

samundar chahta ye hai

mohabbat zer-e-ab aae

chalo in kashtiyon ke baadbanon par

tumhaara nam likh kar hum

sunahre paniyon ke hath mein de den

ye kashti DhunD legi jab

mohabbat ke jazire ko

to hum umr-e-rawan ek sath kaTenge

tumhaara dard banTenge

milo ek din kisi gumnam sahil par