gumbad-e-hayat ek ustur

bahut din hue

devtāoñ kī ik mahfil-e-rang-o-mastī meñ

jab sarmadī zamzama sā uThā

kaif meñ nīlgūñ sā piyāla

ki jis meñ mai-e-arġhavānī uñDelī ga.ī thī

kisī dast-e-qudrat se chhūTā

ulaT kar zamīñ par girā

aur

ye āsmāñ ban gayā

ek be-ant gumbad

ki jis meñ

ka.ī mehr-o-mirrīḳh-o-mahtāb Tāñke ga.e

kahkashā.eñ banā.ī ga.iiñ

phir usī kāsa-e-dahr se

bādaloñ kī namī

ḳhaak meñ bhī numū-gīr hone lagī

zindagī apne ḳhalyāt meñ kasmasāte hue

ḳhāk-zādoñ ke paikar meñ Dhalne lagī

is zamīñ ke jazīre pe

ye ḳhāk-zāde the

jo dekhte dekhte

shāh-zāde hue

chand hī roz meñ

kār-gāh-e-jahāñ

un kī Thokar meñ aane lagī

mo'tadil zindagī kū-e-ifrāt kī samt jaane lagī

ik tavāzun jo pahle thā

be-rabt hotā gayā

gāḌiyoñ enginoñ kār-ḳhānoñ kī ālūdgī se dahakte hue

garm sahrā meñ

kasrat kī ḳhvāhish kahāñ le chalī

kyā havas hai ki nādān qaabū meñ aatī nahīñ

dil qanā'at ke raste pe ruktā nahīñ

ek lashkar-kashī hai yahāñ

har taraf phailtā jā rahā hai dhuāñ

ab koī dam meñ bas

zahr-ālūd bādal barasne ko haiñ

is ḳharābe meñ

har samt ik bād-e-masmūm chalne ko hai

devtā apne mā'bad meñ mahsūr

mab.hūt haiñ

aur idhar

ibn-e-ādam kā aglā qadam

āsmāñ kī 'umūdī jihat toḌ dene ko tayyār hai

dekhnā ab ye hai

zindagī apne gumbad se niklī to āḳhir kahāñ jā.egī

is ġhubāre se bāhar

ye rah pā.egī

bahut din hue

dewtaon ki ek mahfil-e-rang-o-masti mein

jab sarmadi zamzama sa uTha

kaif mein nilgun sa piyala

ki jis mein mai-e-arghawani unDeli gai thi

kisi dast-e-qudrat se chhuTa

ulaT kar zamin par gira

aur

ye aasman ban gaya

ek be-ant gumbad

ki jis mein

kai mehr-o-mirriKH-o-mahtab Tanke gae

kahkashaen banai gain

phir usi kasa-e-dahr se

baadalon ki nami

KHak mein bhi numu-gir hone lagi

zindagi apne KHalyat mein kasmasate hue

KHak-zadon ke paikar mein Dhalne lagi

is zamin ke jazire pe

ye KHak-zade the

jo dekhte dekhte

shah-zade hue

chand hi roz mein

kar-gah-e-jahan

un ki Thokar mein aane lagi

mo'tadil zindagi ku-e-ifraat ki samt jaane lagi

ek tawazun jo pahle tha

be-rabt hota gaya

gaDiyon enginon kar-KHanon ki aaludgi se dahakte hue

garm sahra mein

kasrat ki KHwahish kahan le chali

kya hawas hai ki nadan qabu mein aati nahin

dil qana'at ke raste pe rukta nahin

ek lashkar-kashi hai yahan

har taraf phailta ja raha hai dhuan

ab koi dam mein bas

zahr-alud baadal barasne ko hain

is KHarabe mein

har samt ek baad-e-masmum chalne ko hai

dewta apne ma'bad mein mahsur

mabhut hain

aur idhar

ibn-e-adam ka agla qadam

aasman ki 'umudi jihat toD dene ko tayyar hai

dekhna ab ye hai

zindagi apne gumbad se nikli to aaKHir kahan jaegi

is ghubare se bahar

ye rah paegi