gumnam sipahi ki qabr par

sipāhī aaj bhī koī nahīñ aayā

kisī ne phuul hī bheje

na bastī ke gharoñ se āshnā gītoñ kī āvāzeñ sunā.ī deñ

na parcham koī lahrāyā

sipāhī! shaam hone aa.ī aur koī nahīñ aayā

fanā kī ḳhandaqoñ ko jaan de kar paar kar jaanā baḌī baat

jahāñ jiine kī ḳhātir mar rahe hoñ log us bastī meñ mar jaanā baḌī baat

magar pal bhar ko ye sochā to hotā

tumhāre ba.ad ghar kī muntazir dahlīz ko jaage hue dil kī nishānī kaun degā

havāoñ se ulajhtī raushnī ko e'tibār-e-kāmrānī kaun degā

dar-o-dīvār se lipTī huī beloñ ko paanī kaun degā

sipahi aaj bhi koi nahin aaya

kisi ne phul hi bheje

na basti ke gharon se aashna giton ki aawazen sunai den

na parcham koi lahraya

sipahi! sham hone aai aur koi nahin aaya

fana ki KHandaqon ko jaan de kar par kar jaana baDi baat

jahan jine ki KHatir mar rahe hon log us basti mein mar jaana baDi baat

magar pal bhar ko ye socha to hota

tumhaare baad ghar ki muntazir dahliz ko jage hue dil ki nishani kaun dega

hawaon se ulajhti raushni ko e'tibar-e-kaamrani kaun dega

dar-o-diwar se lipTi hui belon ko pani kaun dega