gunah aur mohabbat

gunāh ke tund-o-tez sho.aloñ se ruuh merī bhaḌak rahī thī

havas kī sunsān vādiyoñ meñ mirī javānī bhaTak rahī thī

mirī javānī ke din guzarte the vahshat-ālūd ishratoñ meñ

mirī javānī ke mai-kadoñ meñ gunāh kī mai chhalak rahī thī

mire harīm-e-gunāh meñ ishq devtā kā guzar nahīñ thā

mire fareb-e-vafā ke sahrā meñ hūr-e-ismat bhaTak rahī thī

mujhe ḳhas-e-nā-tavāñ ke mānind zauq-e-isyāñ bahā rahā thā

gunāh kī mauj-e-fitna-sāmāñ uThā uThā kar paTak rahī thī

shabāb ke avvalīñ dinoñ meñ tabāh o afsurda ho chuke the

mire gulistāñ ke phuul jin se fazā-e-tiflī mahak rahī thī

ġharaz javānī meñ ahrman ke tarab kā sāmān ban gayā maiñ

gunah kī ālā.ishoñ meñ luthḌā huā ik insān ban gayā maiñ

mohabbat

aur ab ki terī mohabbat-e-sarmadī kā bāda-gusār huuñ maiñ

havas-parastī kī lazzat-e-be-sabāt se sharmsār huuñ maiñ

mirī bahīmāna ḳhvāhishoñ ne farār kī raah lī hai dil se

aur un ke badle ik ārzu-e-salīm se ham-kanār huuñ maiñ

dalīl-e-rāh-e-vafā banī haiñ ziya-e-ulfat kī paak kirneñ

phir apne firdaus-e-gum-shuda kī talāsh meñ rah-sipār huuñ maiñ

huā huuñ bedār kaañp kar ik muhīb ḳhvāboñ ke silsile se

aur ab numūd-e-sahar kī ḳhātir sitam-kash-e-intizār huuñ maiñ

bahār-e-taqdīs-e-jāvedāñ kī mujhe phir ik baar aarzū hai

phir ek pākīza zindagī ke liye bahut be-qarār huuñ maiñ

mujhe mohabbat ne ma.asiyat ke jahannamoñ se bachā liyā hai

mujhe javānī kī tīra-o-tār pastiyoñ se uThā liyā hai

gunah ke tund-o-tez shoalon se ruh meri bhaDak rahi thi

hawas ki sunsan wadiyon mein meri jawani bhaTak rahi thi

meri jawani ke din guzarte the wahshat-alud ishraton mein

meri jawani ke mai-kadon mein gunah ki mai chhalak rahi thi

mere harim-e-gunah mein ishq dewta ka guzar nahin tha

mere fareb-e-wafa ke sahra mein hur-e-ismat bhaTak rahi thi

mujhe KHas-e-na-tawan ke manind zauq-e-isyan baha raha tha

gunah ki mauj-e-fitna-saman uTha uTha kar paTak rahi thi

shabab ke awwalin dinon mein tabah o afsurda ho chuke the

mere gulistan ke phul jin se faza-e-tifli mahak rahi thi

gharaz jawani mein ahrman ke tarab ka saman ban gaya main

gunah ki aalaishon mein luthDa hua ek insan ban gaya main

mohabbat

aur ab ki teri mohabbat-e-sarmadi ka baada-gusar hun main

hawas-parasti ki lazzat-e-be-sabaat se sharmsar hun main

meri bahimana KHwahishon ne farar ki rah li hai dil se

aur un ke badle ek aarzu-e-salim se ham-kanar hun main

dalil-e-rah-e-wafa bani hain ziya-e-ulfat ki pak kirnen

phir apne firdaus-e-gum-shuda ki talash mein rah-sipar hun main

hua hun bedar kanp kar ek muhib KHwabon ke silsile se

aur ab numud-e-sahar ki KHatir sitam-kash-e-intizar hun main

bahaar-e-taqdis-e-jawedan ki mujhe phir ek bar aarzu hai

phir ek pakiza zindagi ke liye bahut be-qarar hun main

mujhe mohabbat ne masiyat ke jahannamon se bacha liya hai

mujhe jawani ki tira-o-tar pastiyon se uTha liya hai