gurez

ye jā kar koī bazm-e-ḳhūbāñ meñ kah do

ki ab dar-ḳhor-e-bazm-e-ḳhūbāñ nahīñ maiñ

mubārak tumheñ qasr-o-aivāñ tumhāre

vo dil-dāda-e-qasr-o-aivāñ nahīñ maiñ

javānī bhī sarkash mohabbat bhī sarkash

vo zindānī-e-zulf-e-pechāñ nahīñ maiñ

taḌap merī fitrat taḌaptā huuñ lekin

vo zaḳhmī-e-paikān-e-mizhgāñ nahīñ maiñ

dhaḌaktā hai dil ab bhī rātoñ ko lekin

vo nauha-gar-e-dard-e-hijrāñ nahīñ maiñ

ba-īñ tishna-kāmī ba-īñ talḳh-kāmī

rahīn-e-lab-e-shakkar-afshāñ nahīñ maiñ

sharāb o shabistāñ kā maarā huuñ lekin

vo ġharq-e-sharāb-e-shabistāñ nahīñ maiñ

qasam nutq kī sho.ala-afshāniyoñ kī

ki shā.er to huuñ ab ġhazal-ḳhvāñ nahīñ maiñ

ye ja kar koi bazm-e-KHuban mein kah do

ki ab dar-KHor-e-bazm-e-KHuban nahin main

mubarak tumhein qasr-o-aiwan tumhaare

wo dil-dada-e-qasr-o-aiwan nahin main

jawani bhi sarkash mohabbat bhi sarkash

wo zindani-e-zulf-e-pechan nahin main

taDap meri fitrat taDapta hun lekin

wo zaKHmi-e-paikan-e-mizhgan nahin main

dhaDakta hai dil ab bhi raaton ko lekin

wo nauha-gar-e-dard-e-hijran nahin main

ba-in tishna-kaami ba-in talKH-kaami

rahin-e-lab-e-shakkar-afshan nahin main

sharab o shabistan ka mara hun lekin

wo gharq-e-sharab-e-shabistan nahin main

qasam nutq ki shoala-afshaniyon ki

ki shaer to hun ab ghazal-KHwan nahin main