ghurur ki haar

ik phuul kī kahānī bachcho sunā.ūñ tum ko

ye baat kaam kī hai aao batā.ūñ tum ko

ik phuul thā chaman meñ ma.asūm pyārā pyārā

har phuul se chaman ke thā rañg us kā nyārā

har phuul dil se us kī tāzīm kar rahā thā

aur us kī bartarī ko taslīm kar rahā thā

kartā thā pyaar har dam saarā hī baaġh us ko

hāsil thā sab ġhamoñ se ya.anī farāġh us ko

apne ko pā ke tanhā ik din ye us ne sochā

kartā hai merī izzat har phuul hī chaman kā

ya.anī maiñ is chaman meñ huuñ sab se ḳhūbsūrat

shāyad isī liye sab karte haiñ merī izzat

ye baat us ne sochī maġhrūr ho gayā vo

nekī ke rāste se phir duur ho gayā vo

andāz jab chaman ke phūloñ ne us kā dekhā

ye faisla kiyā ham hoñge na us pe shaidā

phir yuuñ huā ki rūThī us se chaman kī bastī

mālūm ho ga.ī phir us gul ko apnī hastī

al-qissa us ne bachcho apnā ġhurūr toḌā

ulfat gale lagā.ī nafrat ko duur chhoḌā

vo phuul ho gayā phir saare chaman ko pyārā

aur ban gayā chaman meñ āñkhoñ kī sab ke taarā

ek phul ki kahani bachcho sunaun tum ko

ye baat kaam ki hai aao bataun tum ko

ek phul tha chaman mein masum pyara pyara

har phul se chaman ke tha rang us ka nyara

har phul dil se us ki tazim kar raha tha

aur us ki bartari ko taslim kar raha tha

karta tha pyar har dam sara hi bagh us ko

hasil tha sab ghamon se yani faragh us ko

apne ko pa ke tanha ek din ye us ne socha

karta hai meri izzat har phul hi chaman ka

yani main is chaman mein hun sab se KHubsurat

shayad isi liye sab karte hain meri izzat

ye baat us ne sochi maghrur ho gaya wo

neki ke raste se phir dur ho gaya wo

andaz jab chaman ke phulon ne us ka dekha

ye faisla kiya hum honge na us pe shaida

phir yun hua ki ruThi us se chaman ki basti

malum ho gai phir us gul ko apni hasti

al-qissa us ne bachcho apna ghurur toDa

ulfat gale lagai nafrat ko dur chhoDa

wo phul ho gaya phir sare chaman ko pyara

aur ban gaya chaman mein aankhon ki sab ke tara