hadisa

salīb se jo Tapaktā hai be-gunāh lahū

vo buuñd buuñd kā apnī

hisāb letā hai

zamīn-e-jabr kī afvāj-e-fīl vāqif haiñ

fazā meñ aise parindoñ kā

ek ġhol bhī hai

jo kañkarī se chaTānoñ ko toḌ detā hai

jab apnī had se guzarte haiñ

abrahī sailāb

ye sang-rezo se

ruḳh un ke moḌ detā hai

so jab ye sāzishī sayyād tā.eroñ ke liye

fazā meñ har taraf ik jaal taan baiThe hoñ

to hādsāt

koī ehtimām karte haiñ

kahīñ se maut ke kankar

uchhāltā hai koī

usī ke daam use

zer-e-dām karte haiñ

bas aur kuchh nahīñ

in hādsāt kī tafsīl

ye hādsāt

to hujjat tamām karte haiñ

salib se jo Tapakta hai be-gunah lahu

wo bund bund ka apni

hisab leta hai

zamin-e-jabr ki afwaj-e-fil waqif hain

faza mein aise parindon ka

ek ghol bhi hai

jo kankari se chaTanon ko toD deta hai

jab apni had se guzarte hain

abrahi sailab

ye sang-rezo se

ruKH un ke moD deta hai

so jab ye sazishi sayyaad taeron ke liye

faza mein har taraf ek jal tan baiThe hon

to hadsat

koi ehtimam karte hain

kahin se maut ke kankar

uchhaalta hai koi

usi ke dam use

zer-e-dam karte hain

bas aur kuchh nahin

in hadsat ki tafsil

ye hadsat

to hujjat tamam karte hain