hae bapu teri duhai hai

ḳhū-e-āzād jis ne paa.ī hai

us ke qabze meñ kul ḳhudā.ī hai

un se maiñ bhī ye baat kahtā huuñ

jin kī taqdīr meñ burā.ī hai

apne maazī pe Daal lo nazreñ

kis qadar kis ne kī bhalā.ī hai

baat aa.ī zabāñ pe kahtā huuñ

ye to bandoñ hī kī ḳhudā.ī hai

rok kar galā kar rahe haiñ black

qaht kī har taraf dahā.ī hai

kitne Theke meñ ab kī baar bache

kitnī rishvat kī daulat aa.ī hai

apne apnoñ ko pūchhtā hai har ik

ahl-e-tāqat hī kī ban aa.ī hai

gar minister hai aap kā saalā

to collector banā jamā.ī hai

hai jo enginēr sifārish se

phir to Theke meñ is kā bhaa.ī hai

ḳhauf hai kis kā raaj hai apnā

apnā hī saarā āna-pā.ī hai

rozī aur rozgār haiñ un ke

ham ġharīboñ kā haq gadā.ī hai

in kā zarīya hai ye kamāne kā

dekhne hī kī pārsā.ī hai

kis se jā kar 'kañval' kare fariyād

haa.e baapū tirī duhā.ī hai

aaj phir se august aayā hai

sab ke ghar meñ ḳhushī hī chhā.ī hai

sāl-e-ā.inda ke kamāne ko

tum ne scheme kyā banā.ī hai

KHu-e-azad jis ne pai hai

us ke qabze mein kul KHudai hai

un se main bhi ye baat kahta hun

jin ki taqdir mein burai hai

apne mazi pe Dal lo nazren

kis qadar kis ne ki bhalai hai

baat aai zaban pe kahta hun

ye to bandon hi ki KHudai hai

rok kar gala kar rahe hain black

qaht ki har taraf dahai hai

kitne Theke mein ab ki bar bache

kitni rishwat ki daulat aai hai

apne apnon ko puchhta hai har ek

ahl-e-taqat hi ki ban aai hai

gar minister hai aap ka sala

to collector bana jamai hai

hai jo engineer sifarish se

phir to Theke mein is ka bhai hai

KHauf hai kis ka raj hai apna

apna hi sara aana-pai hai

rozi aur rozgar hain un ke

hum gharibon ka haq gadai hai

in ka zariya hai ye kamane ka

dekhne hi ki parsai hai

kis se ja kar 'kanwal' kare fariyaad

hae bapu teri duhai hai

aaj phir se august aaya hai

sab ke ghar mein KHushi hi chhai hai

sal-e-ainda ke kamane ko

tum ne scheme kya banai hai