haar-singar

tum ne dekhe haiñ kabhī hār-siñgār

vo dil-āvez se ma.asūm se do-rañge phuul

raat ko shāḳh pe khilte the sitāroñ kī tarah

vo bhalā din kī tamāzat ke sitam kyuuñ sahte

is liye āḳhir-e-shab apne hī husn se be-ḳhud ho kar

os se bhīge hue farsh pe kis pyaar se bichh jaate the

jaise kal raat yahāñ

za.afarāñ rañg kī chādar pe bikhere hoñ kisī ne motī

aur har roz savere koī bachchī aa kar

farsh-e-gul par bahut āhista se chaltī thī

ḳhayāloñ meñ pahuñch jaatī thī

is paristāñ meñ ki jis kī pariyāñ

raat ko farsh pe ye phuul bichhā jaatī thiiñ

yaad galiyoñ se guzartī huuñ to bachpan ke kisī moḌ pe mil jaate hai

vahī ma.asūm, dil-āvez, subuk hār-siñgār

jāntī huuñ maiñ vahāñ

ab mire sahn kī dīvār ke us paar nahīñ koī daraḳht

ab vahāñ ek imārat hai bahut ūñchī sī

tum ne dekhe hain kabhi haar-singar

wo dil-awez se masum se do-range phul

raat ko shaKH pe khilte the sitaron ki tarah

wo bhala din ki tamazat ke sitam kyun sahte

is liye aaKHir-e-shab apne hi husn se be-KHud ho kar

os se bhige hue farsh pe kis pyar se bichh jate the

jaise kal raat yahan

zafaran rang ki chadar pe bikhere hon kisi ne moti

aur har roz sawere koi bachchi aa kar

farsh-e-gul par bahut aahista se chalti thi

KHayalon mein pahunch jati thi

is paristan mein ki jis ki pariyan

raat ko farsh pe ye phul bichha jati thin

yaad galiyon se guzarti hun to bachpan ke kisi moD pe mil jate hai

wahi masum, dil-awez, subuk haar-singar

jaanti hun main wahan

ab mere sahn ki diwar ke us par nahin koi daraKHt

ab wahan ek imarat hai bahut unchi si