hum anjam

mirī mānind vo bhī

zulmat-e-shab kī musāfir thī

añdhere rāstoñ meñ

sub.h-e-nau ke ḳhvāb

āñkhoñ meñ sajā.e

ba-nām manzil be-nām

uftāñ aur ḳhezāñ

qadam apne baḌhā.e

sahar kā ḳhvāb

āñkhoñ meñ sajā.e

safar jitnā bhī ham tai kar rahe the

masāfat thī ki baḌhtī jā rahī thī

sukūt-e-sub.h kī māyūsiyoñ meñ

jo ik tanhā rafīq-e-rahravī thī

vahī sham-e-tamannā bujh rahī thī

azāb-e-tīrgī nāzil huā

mujh par bhī is par bhī

ki ye hukm-e-falak thā

sahar kā ḳhvāb

donoñ kā gunāh mushtarak thā

meri manind wo bhi

zulmat-e-shab ki musafir thi

andhere raston mein

subh-e-nau ke KHwab

aankhon mein sajae

ba-nam manzil be-nam

uftan aur KHezan

qadam apne baDhae

sahar ka KHwab

aankhon mein sajae

safar jitna bhi hum tai kar rahe the

masafat thi ki baDhti ja rahi thi

sukut-e-subh ki mayusiyon mein

jo ek tanha rafiq-e-rahrawi thi

wahi sham-e-tamanna bujh rahi thi

azab-e-tirgi nazil hua

mujh par bhi is par bhi

ki ye hukm-e-falak tha

sahar ka KHwab

donon ka gunah mushtarak tha