hum KHud bhi apne sath nahin

ik kabhī na bītne vaalī shab

ik haath na aane vaalā din

is shab se jaan chhuḌāne meñ

us din ko DhūñD ke laane meñ

ham reza reza ho ke rahe

jo paayā thā vo kho ke rahe

is paane meñ is khone meñ

hone meñ aur na hone meñ

kuchh sūd-o-ziyāñ kā haath hai kyā

yā aur hī koī baat hai kyā

is saarī izāfī bātoñ meñ

bas ek hī baat zarūrī hai

yaañ shab kī sahar se duurī hai

is shab ke tasalsul meñ pinhāñ

ik ghor añdherā jahl kā hai

jis jahl kī kaalī āñdhī ne

jīvan ke sach ko chaaT liyā

aur ham ne isī vīrānī meñ

ik andhā jīvan kaaT liyā

is kaale andhe jīvan meñ

ġhurbat kī tīra-baḳhtī ne

kuchh qismat ke ehsān ne bhī

kuchh jabr-e-vaqt kī saḳhtī ne

insān se kyā kuchh chhīnā hai

ye jiinā kaisā jiinā hai

pasmāñdgī-e-jāñ ruuh talak

dar aa.ī siyāhī oḌhe hue

ham maqtal-e-shab meñ aa baiThe

inkār kā dāman chhoḌe hue

inkār ki jis kī jumbish-e-lab

har shab kī sahar ban saktī hai

ye jur.at-o-nā-farmānī-e-shab

bebas kī sipar ban saktī hai

phir kyoñ is qatl-gah-e-shab meñ

aa baiThe haiñ jī haar ke ham

iqrār se lab āsūda sahī

munkir to nahīñ inkār ke ham

is shab-dar-shab tārīkī meñ

jo raat bhī hai vo raat nahīñ

is hārne vaalī baazī meñ

jo maat bhī hai vo maat nahīñ

kuchh qismat kī saffākī nahīñ

kuchh sūd-o-ziyāñ kā haath nahīñ

bas ek hī dukh be-pāyāñ hai

ham ḳhud bhī apne saath nahīñ

ek kabhi na bitne wali shab

ek hath na aane wala din

is shab se jaan chhuDane mein

us din ko DhunD ke lane mein

hum reza reza ho ke rahe

jo paya tha wo kho ke rahe

is pane mein is khone mein

hone mein aur na hone mein

kuchh sud-o-ziyan ka hath hai kya

ya aur hi koi baat hai kya

is sari izafi baaton mein

bas ek hi baat zaruri hai

yan shab ki sahar se duri hai

is shab ke tasalsul mein pinhan

ek ghor andhera jahl ka hai

jis jahl ki kali aandhi ne

jiwan ke sach ko chaT liya

aur hum ne isi virani mein

ek andha jiwan kaT liya

is kale andhe jiwan mein

ghurbat ki tira-baKHti ne

kuchh qismat ke ehsan ne bhi

kuchh jabr-e-waqt ki saKHti ne

insan se kya kuchh chhina hai

ye jina kaisa jina hai

pasmandgi-e-jaan ruh talak

dar aai siyahi oDhe hue

hum maqtal-e-shab mein aa baiThe

inkar ka daman chhoDe hue

inkar ki jis ki jumbish-e-lab

har shab ki sahar ban sakti hai

ye jurat-o-na-farmani-e-shab

bebas ki sipar ban sakti hai

phir kyon is qatl-gah-e-shab mein

aa baiThe hain ji haar ke hum

iqrar se lab aasuda sahi

munkir to nahin inkar ke hum

is shab-dar-shab tariki mein

jo raat bhi hai wo raat nahin

is haarne wali bazi mein

jo mat bhi hai wo mat nahin

kuchh qismat ki saffaki nahin

kuchh sud-o-ziyan ka hath nahin

bas ek hi dukh be-payan hai

hum KHud bhi apne sath nahin