hum log

dil ke aivāñ meñ liye gul-shuda sham.oñ kī qatār

nūr-e-ḳhurshīd se sahme hue uktā.e hue

husn-e-mahbūb ke sayyāl tasavvur kī tarah

apnī tārīkī ko bheñche hue lipTā.e hue

ġhāyat-e-sūd-o-ziyāñ sūrat-e-āġhāz-o-ma.āl

vahī be-sūd-e-tajassus vahī bekār savāl

muzmahil sā.at-e-imroz kī be-rañgī se

yād-e-māzī se ġhamīñ dahshat-e-fardā se niDhāl

tishna afkār jo taskīn nahīñ paate haiñ

soḳhta ashk jo āñkhoñ meñ nahīñ aate haiñ

ik kaḌā dard ki jo giit meñ Dhaltā hī nahīñ

dil ke tārīk shagāfoñ se nikaltā hī nahīñ

aur uljhī huī mauhūm sī darbāñ kī talāsh

dasht o zindāñ kī havas chāk-e-girebāñ kī talāsh

dil ke aiwan mein liye gul-shuda shamon ki qatar

nur-e-KHurshid se sahme hue uktae hue

husn-e-mahbub ke sayyal tasawwur ki tarah

apni tariki ko bhenche hue lipTae hue

ghayat-e-sud-o-ziyan surat-e-aghaz-o-maal

wahi be-sud-e-tajassus wahi bekar sawal

muzmahil saat-e-imroz ki be-rangi se

yaad-e-mazi se ghamin dahshat-e-farda se niDhaal

tishna afkar jo taskin nahin pate hain

soKHta ashk jo aankhon mein nahin aate hain

ek kaDa dard ki jo git mein Dhalta hi nahin

dil ke tarik shagafon se nikalta hi nahin

aur uljhi hui mauhum si darban ki talash

dasht o zindan ki hawas chaak-e-gireban ki talash