hum to majbur-e-wafa hain

tujh ko kitnoñ kā lahū chāhiye ai arz-e-vatan

jo tire āriz-e-be-rañg ko gulnār kareñ

kitnī aahoñ se kaleja tirā ThanDā hogā

kitne aañsū tire sahrāoñ ko gulzār kareñ

tere aivānoñ meñ purze hue paimāñ kitne

kitne va.ade jo na āsūda-e-iqrār hue

kitnī āñkhoñ ko nazar khā ga.ī bad-ḳhvāhoñ kī

ḳhvāb kitne tirī shah-rāhoñ meñ sañgsār hue

''balā-kashān-e-mohabbat pe jo huā so huā

jo mujh pe guzrī mat us se kaho, huā so huā

mabādā ho koī zālim tirā garebāñ-gīr

lahū ke daaġh tū dāman se dho, huā so huā''

ham to majbūr-e-vafā haiñ magar ai jān-e-jahāñ

apne ushshāq se aise bhī koī kartā hai

terī mahfil ko ḳhudā rakkhe abad tak qaa.em

ham to mehmāñ haiñ ghaḌī bhar ke hamārā kyā hai

tujh ko kitnon ka lahu chahiye ai arz-e-watan

jo tere aariz-e-be-rang ko gulnar karen

kitni aahon se kaleja tera ThanDa hoga

kitne aansu tere sahraon ko gulzar karen

tere aiwanon mein purze hue paiman kitne

kitne wade jo na aasuda-e-iqrar hue

kitni aankhon ko nazar kha gai bad-KHwahon ki

KHwab kitne teri shah-rahon mein sangsar hue

bala-kashan-e-mohabbat pe jo hua so hua

jo mujh pe guzri mat us se kaho, hua so hua

mabaada ho koi zalim tera gareban-gir

lahu ke dagh tu daman se dho, hua so hua

hum to majbur-e-wafa hain magar ai jaan-e-jahan

apne ushshaq se aise bhi koi karta hai

teri mahfil ko KHuda rakkhe abad tak qaem

hum to mehman hain ghaDi bhar ke hamara kya hai