hum to majbur the is dil se

ham to majbūr the is dil se ki jis meñ har dam

gardish-e-ḳhūñ se vo kohrām bapā rahtā hai

jaise rindadan-e-balā-nosh jo mil baiTheñ baham

mai-kade meñ safar-e-jām bapā rahtā hai

soz-e-ḳhātir ko milā jab bhī sahārā koī

dāġh-e-hirmān koii, dard-e-tamannā koī

marham-e-yās se mā.il-ba-shifā hone lagā

zaḳhm-e-ummīd koī phir se harā hone lagā

ham to majbūr the is dil se ki jis kī zid par

ham ne us raat ke māthe pe sahar kī tahrīr

jis ke dāman meñ añdhere ke sivā kuchh bhī na thā

ham ne is dasht ko Thahrā liyā firdaus-e-nazīr

jis meñ juz san.at-e-ḳhūn-e-sar-e-pā kuchh bhī na thā

dil ko ta.abīr koī aur gavārā hī na thī

kulfat-e-zīst to manzūr thī har taur magar

rāhat-e-marg kisī taur gavārā hī na thī

hum to majbur the is dil se ki jis mein har dam

gardish-e-KHun se wo kohram bapa rahta hai

jaise rindadan-e-bala-nosh jo mil baiThen baham

mai-kade mein safar-e-jam bapa rahta hai

soz-e-KHatir ko mila jab bhi sahaara koi

dagh-e-hirman koi, dard-e-tamanna koi

marham-e-yas se mail-ba-shifa hone laga

zaKHm-e-ummid koi phir se hara hone laga

hum to majbur the is dil se ki jis ki zid par

hum ne us raat ke mathe pe sahar ki tahrir

jis ke daman mein andhere ke siwa kuchh bhi na tha

hum ne is dasht ko Thahra liya firdaus-e-nazir

jis mein juz sanat-e-KHun-e-sar-e-pa kuchh bhi na tha

dil ko tabir koi aur gawara hi na thi

kulfat-e-zist to manzur thi har taur magar

rahat-e-marg kisi taur gawara hi na thi