hamare dukhon ka ilaj kahan hai

agar hamāre dukhoñ kā ilaaj

niiñd hai

to koī ham se ziyāda gahrī niiñd nahīñ so saktā

aur na hī itnī āsānī aur ḳhūb-sūratī se

koī niiñd meñ chal saktā hai

agar hamāre dukhoñ kā ilaaj

jāgnā hai

to ham is qadar jaag sakte haiñ

ki har raat hamārī āñkhoñ meñ ārām kar saktī hai

aur har darvāza

hamāre dil meñ khul saktā hai

agar hamāre dukhoñ kā ilaaj

hañsnā hai

to ham itnā hañs sakte haiñ

ki parinde, daraḳhtoñ se uḌ jaa.eñ

aur pahāḌ hamārī hañsī kī guuñj se bhar jaa.eñ

ham itnā hañs sakte haiñ

ki koī masḳhara yā pāgal

is kā tasavvur tak nahīñ kar saktā

agar hamāre dukhoñ kā ilaaj

ronā hai

to hamāre paas itne aañsū haiñ

ki in meñ saarī duniyā ko Duboyā jā saktā hai

jahannam bujhā.e jā sakte haiñ

aur saarī zamīn ko paanī diyā jā saktā hai

agar hamāre dukhoñ kā ilaaj

jiinā hai

to ham se ziyāda bā-ma.anī zindagī

kaun guzār saktā hai

aur kaun aise salīqe aur aziyyat se

is duniyā ko dekh saktā hai

agar hamāre dukhoñ kā ilaaj

bolnā hai

to ham havā kī tarah guftugū kar sakte haiñ

aur apne lafzoñ kī ḳhushbū se

phuul khilā sakte haiñ

aur agar tum kahte ho:

hamāre dukhoñ kā ilaaj kahīñ nahīñ hai

to ham chup rah sakte haiñ

qabroñ se bhī ziyāda

agar hamare dukhon ka ilaj

nind hai

to koi hum se ziyaada gahri nind nahin so sakta

aur na hi itni aasani aur KHub-surati se

koi nind mein chal sakta hai

agar hamare dukhon ka ilaj

jagna hai

to hum is qadar jag sakte hain

ki har raat hamari aankhon mein aaram kar sakti hai

aur har darwaza

hamare dil mein khul sakta hai

agar hamare dukhon ka ilaj

hansna hai

to hum itna hans sakte hain

ki parinde, daraKHton se uD jaen

aur pahaD hamari hansi ki gunj se bhar jaen

hum itna hans sakte hain

ki koi masKHara ya pagal

is ka tasawwur tak nahin kar sakta

agar hamare dukhon ka ilaj

rona hai

to hamare pas itne aansu hain

ki in mein sari duniya ko Duboya ja sakta hai

jahannam bujhae ja sakte hain

aur sari zamin ko pani diya ja sakta hai

agar hamare dukhon ka ilaj

jina hai

to hum se ziyaada ba-mani zindagi

kaun guzar sakta hai

aur kaun aise saliqe aur aziyyat se

is duniya ko dekh sakta hai

agar hamare dukhon ka ilaj

bolna hai

to hum hawa ki tarah guftugu kar sakte hain

aur apne lafzon ki KHushbu se

phul khila sakte hain

aur agar tum kahte ho:

hamare dukhon ka ilaj kahin nahin hai

to hum chup rah sakte hain

qabron se bhi ziyaada