hamari kitab

jo bhī kitābeñ maiñ ne paḌhī haiñ

ek zabāñ ho kar bolī haiñ

ham sab achchhe dost tumhāre

ham sab sachche dost tumhāre

qisse kahānī tumheñ sunāte

bāteñ karte dil bahlāte

duniyā bhar kī sair karāte

ghar baiThe ham tumheñ ghumāte

baḌe baḌoñ se tumheñ milāte

un kī bāteñ tumheñ sunāte

āsmān kī sair karāte

chandā maamā se milvāte

kabhī havā meñ tumheñ uḌāte

kabhī zamīñ kī sair karāte

la.al-o-guhar lafzoñ meñ chhupe haiñ

hiire javāhar bikhre paḌe haiñ

ahl-e-qalam ne jo likkhā hai

ik ik jumla besh-bahā hai

shauq se mujh ko jo paḌhte haiñ

darjoñ meñ achchhe laḌke haiñ

mujh se mohabbat karte haiñ jo

jāgte sote paḌhte haiñ jo

ilm se mālā-māl vahī haiñ

'ġhālib' aur 'iqbāl' vahī haiñ

jo bhi kitaben main ne paDhi hain

ek zaban ho kar boli hain

hum sab achchhe dost tumhaare

hum sab sachche dost tumhaare

qisse kahani tumhein sunate

baaten karte dil bahlate

duniya bhar ki sair karaate

ghar baiThe hum tumhein ghumate

baDe baDon se tumhein milate

un ki baaten tumhein sunate

aasman ki sair karaate

chanda mama se milwate

kabhi hawa mein tumhein uDate

kabhi zamin ki sair karaate

lal-o-guhar lafzon mein chhupe hain

hire jawahar bikhre paDe hain

ahl-e-qalam ne jo likkha hai

ek ek jumla besh-baha hai

shauq se mujh ko jo paDhte hain

darjon mein achchhe laDke hain

mujh se mohabbat karte hain jo

jagte sote paDhte hain jo

ilm se mala-mal wahi hain

'ghaalib' aur 'iqbaal' wahi hain